تعرفوا ع منتزه الكلاب الجديد ببيروت، التفاصيل هون
الموقع الجديد لـ Souk El Tayeb عم يجمع كل الأشيا اللي منحبها ببيروت: نتسوّق منتجات محلي بالسوق، نستمتع بأكلات معمولة من خضرة وفواكه موسمية طازة بالكافيه تبعهن، وهلّق صار فيكن تجيبوا كلبكن ليقضي النهار معكن! سوق الطيب افتتح منتزه الكلاب بالتعاون مع جمعية Gaïa Fodoulian، وهون كل شي لازم تعرفوه عن هالمساحة الجديدة.
المكان موجود جوّا Souk El Tayeb، والمنتزه مفتوح كل سبت وأحد من الـ 9 الصبح للـ 4 بعد الضهر. سواء جايي عالسوق الأسبوعي أو ضهرة نهار الأحد، هلّق صار في محل مخصّص لكلبك ليتعرّف ع كلاب تانية ويتدلع ع الآخر.
كمان تعاونوا مع فادي خوري ليقدّم خدمات تدريب كلاب احترافية بالمكان.
قواعد وتعليمات منتزه الكلاب 🐾
لحتى يضلّ المكان آمن، نضيف وممتع للكل، كل الزوّار لازم يلتزموا بهالإرشادات:
– دايمًا خلّي كلبك مع السلسلة لتفوت بأمان على المتنزه. هالشي بساعد لتجنب الحوادث وبيضمن يكون عندك تحكم كامل قبل ما يختلط مع باقي الكلاب.
– دايمًا نظّف ورا كلبك. جيب معك أكياس للنفايات وكبّها بسلال الزبالة المخصّصة.
– راقب نفسية كلبك. إذا مبين عليه متوتر، مضغوط أو عدواني ضمن مجموعة كبيرة، خدّه لبرا شوي ليهدا.
– ما تخلي كلبك يزعج أو يُضايق كلاب تانية. هيدا بيتضمن “سرقة” اللعب أو العظم. إذا صار كلب تاني عدائي تجاه كلبك، اعطيهن شوية مساحة وابتعدوا شوي.
– الأكل ممكن يسبّب عدوانية حتى لألطف الكلاب. خلّي كل السناك والتيّريتس برا المنتزه وكبّ البقايا بطريقة مناسبة.
– إنت مسؤول عن تصرّفات كلبك. إذا كان كتير متحمّس أو عم يشكّل خطر عغيره، لازم يترك المنتزه لحد ما يتدرب أكتر.
– الحوادث بتصير. خلي معك علبة إسعافات أولية إلك ولحيوانك الأليف، واحتفظ برقم أقرب دكتور بيطري بتلفونك.
– المنتزه منطقة بيكون الكلاب عندن فيها طاقة عالية. الأحسن ما تجيبوا ولاد صغار لجوا؛ وإذا اضطرّوا يكونوا موجودين، لازم يكونوا تحت مراقبة مشدّدة ودائمة.
لتحصلوا على معلومات أكتر أو إذا حابين تتطوعوا، فيكن تتصلوا عالرقم 199 775 03. خدمات تدريب الكلاب المحترفة مع فادي خوري كمان متوفرة للحجز عالرقم 447 764 03.
رح منتزه الكلاب بـ Souk El tayeb هالويك أند؟ تأكّدوا تابعوهن على إنستغرام لمزيد من التفاصيل!
