شاب لبناني ترك بيته بالضاحية… كرمال كلبته
انتشر على مواقع التواصل الاجتماعي فيديو للشاب اللبناني حمزة بيطار، يشرح فيه السبب الحقيقي اللي خلاه يترك بيته بالضاحية بعد الغارات العنيفة. بالفيديو، حكى حمزة بصراحة عن القرار الصعب بالإخلاء، وقال إنه ما كان بده يترك بيته أبدًا.
حمزة وضّح إنه كان محضّر حاله يتحمّل صوت القصف والغارات، وناوي يضل ببيته مهما صار. بس القرار تغيّر لما لاحظ أديه كلبته صارت متوترة وخايفة. وقتها حسّ إنه ما فيه يعرّضها لهالضغط والخطر، فاختار يترك البيت ويطلع معها حفاظًا على سلامتها وراحتها. فيكن تحضروا الفيديو هون:
الفيديو لاقى تفاعل واسع، وغمره المشاهدين بتعليقات مليانة إعجاب وتقدير لموقفه، لأنه رفض يترك كلبته وراه واعتبرها جزء من العيلة.
هالقصة بتسلّط الضو على واقع غالبًا بينتسى وقت الأزمات: كتير من الناس بيضطروا يتركوا حيواناتهن الأليفة وراهن خلال عمليات الإخلاء. القطط والكلاب وحتى الماشية، وأحيانًا الحيوانات البرية، بتواجه ظروف قاسية لما تنترك لوحدها، من الجوع والمرض وحتى الموت.
اليوم، ملاجئ الحيوانات بلبنان عم تواجه ضغط كبير لتلبية الطلب المتزايد على الرعاية والطعام وتأمين أماكن آمنة للحيوانات اللي فقدت بيوتها. هالملاجئ بحاجة ماسّة للدعم والتبرعات حتى تقدر تكمل رسالتها وتوفّر الحماية لهالحيوانات.
منتمنا السلامة لكل أهلنا بالجنوب والبقاع والضاحية، بما فيهم حمزة وكلبته، ونأمل يرجعوا قريبًا إلى بيوتهن بأمان.
حبيتوا قصة هيدا الشاب مع كلبته؟ إذا حابين تعملوا فرق، تبرعوا لملجأ الحيوانات Mashalah Shelter بالجنوب يلي بعدو عم يقدّم مأوى وأكل وعناية طبية وعمليات إنقاذ للحيوانات المتضررة من الحرب والنزوح.
تأكدوا إنكن تشوفوا قسم #دعم_لبنان للمزيد من المحتوى متل هيدا.
