مسرحية “راجعين” للشباب النازحين بالمسرح الوطني (الدخول مجاني)!
لتسليط الضو على أصوات الشباب النازحين بلبنان، رح ينعمل عرض مسرحي جديد بينقل تجاربهن الخاصة على خشبة المسرح. المسرح الوطني اللبناني ببيروت رح يستضيف ب 27 آذار مسرحية “راجعين”، وهو عرض مجاني بيحكي قصص شخصية حقيقية لشباب مرّوا بتجربة النزوح. العرض رح يكون على مسرح Le Colisée بالحمرا، والدخول مجاني للكل.
المميز بهيدا العمل إنو ما في ممثلين محترفين، بس الشباب نفسن هني اللي عم يوقفوا على المسرح ويشاركوا قصصن بصوتن. من خلال هالتجارب، المسرحية بتسلّط الضو على واقع كتير عيل بلبنان اليوم. ومع تزامنها مع يوم المسرح العالمي، بتفرجينا كيف المسرح ممكن يكون مساحة للتعبير.
هيدا العرض بيجي بعد فترة قصيرة من خطوة إنسانية أخدها المسرح الوطني، لما أعلن المؤسس قاسم اسطنبولي إنو المسارح رح تفتح أبوابها للعيل اللي اضطرت تترك بيوتها.
بالفعل، تم تحويل أماكن متل سينما ريفولي بصور وسينما إمباير بطرابلس لمأوى، مع تأمين كل الاحتياجات الأساسية بالتعاون مع متطوعين من جمعية تيرو للفنون.
الموعد نهار الجمعة 27 آذار، الساعة 6 المسا بسينما Le Colisée – الحمرا. كونوا كتار! فرصة حلوة تسمعوا القصص مباشرة من أصحابها، وتشوفوا كيف المعاناة بتتحوّل لفن ورسالة.
