ليلة بقلب الخيمة…شابة لبنانية قررت التخييم مع النازحين
ميساء، شابة لبنانية مشهورة بتحدياتها على السوشيال ميديا يلي دايمًا بتكسر الصورة النمطية عن البنات، قررت هالمرة تعمل تجربة مختلفة. قررت تجرب حياة التخييم عند النازحين بسبب الحرب، لتعرف عن قرب شو يعني تعيش بلا بيت، بلا راحة، وبظروف صعبة.
راحت على البيال، معروف إنه فيه عدد كبير من النازحين. أول شي عملته ميساء كان تثبيت الخيمة، حطّت الطبليات وربطت الخيمة وبعدها الحجار لتثبتها منيح. ولما خلّصت، دعيت شوي: “يا رب ما تشتي علينا!”، بس للأسف، الشتي بلّش وخلّى الوضع أصعب.
ولّعت نار صغيرة لتدفية حالها، وحاولت تتأقلم مع البرد. ولما صار وقت النوم، شاركت ميساء تجربتها بصراحة: “رأيي بالنومة… مش كتير مريحة، نايمة ع الخشب ومنخاري مبوّز… والطيران الحربي كان كتير واطي… الله يعين النازحين”. حسّت عن جد شو يعني العيش بظروف صعبة ومن دون مأوى، خاصةً لبنت لحالها.
التجربة كانت صعبة، بس عطتها فرصة تفهم أكتر حياة البنات النازحات، التعب النفسي والجسدي يلي عم يمرّوا فيه، وقساوة الظروف يلي عم يواجهوها. بنفس الوقت، مشاركة تجربتها على السوشيال ميديا كانت رسالة لكل متابعينها: لازم نحس باللي حوالينا ونقدّر النعم يلي عنا، وما نتجاهل المعاناة يلي صايرة حوالينا كل يوم.
إذا بدكن تعرفوا المزيد عن كيف تدعموا النازحين بلبنان، شوفوا قسم دعم لبنان ع الموقع.
