صحافية لبنانية تحوّل الإسعاف لصيدلية متنقلة للنازحين
رتاج الزكنون، الصحافية والناشطة اللبنانية من صيدا، عم تثبت يوم بعد يوم إنو العمل الإنساني مش بس واجب، بس رسالة حقيقية بتنبع من القلب. واليوم عم تبتكر مبادرات جديدة وحلوة، خصوصًا فكرة تحويل سيارة الإسعاف لصيدلية متنقلة.
من أول أيام الحرب ولهلّق، ما وقفت لحظة عن مساعدة الناس النازحين، وكانت دايمًا موجودة معن، سواء بالمدارس أو عالطرقات. من خلال مبادراتها، رتاج وفريق المتطوعين قدروا يقدّموا كل شي ! وجبات أكل، أدوية، حليب للأطفال، حفاضات، فرش، مخدات، حرامات، مونة غذائية، خيم، وكل أساسيات الحياة الضرورية بهيك ظروف صعبة. وكل هيدا كان ممكن بفضل التكاتف والتبرعات من ناس بعدها مؤمنة بالخير وبدعم غيرها.
واليوم عم تكمل بمبادرة “الصيدلية المتنقلة” بالتعاون مع مؤسسة مرجان وجمعية إنسان الغد. المبادرة انطلقت بسيارة إسعاف لتوصل الدوا و رعاية طبية لأهلنا النازحين ع الطرقات، خصوصًا بهيدي الفترة الحساسة اللي سيارات الإسعاف والطواقم الطبية فيها عم تتعرض للتهديد. هالخطوة مش بس إنسانية، إنما كمان فيها جرأة وإصرار كبير!
رتاج بتحكي عن هالمبادرة: “في عالم ما فيها توصل للصيدلية، فكرنا نخلي الصيدلية توصل لعندن. يمكن نحنا ما فينا نوقف الحرب، بس فينا نخفف من وجعها… كل إنسان فينا يقدر يكون علاج لحد تاني”.
المبادرة عم تكون طوق أمل لناس كتير ما عندها القدرة توصل للدواء أو الرعاية، وعم تعطي رسالة قوية إنو التضامن بعدو موجود. فيكن تدعموا هيك مبادرات مع رتاج ع الرقم: 538 066 03. ما تنسوا تابعوها هون.
