أهضم صدفة…مهدي ومحمد اجتمعوا من جديد بمركز إيواء!
أوقات الحياة بتجمعك بأغرب وأحلى الصدف، حتى بأصعب الظروف. قصة الولدين مهدي ومحمد مثال حلو على هالشي، وكيف القدر جمعهن بعد فترة غياب دامت حوالي 15 شهر.
مهدي ومحمد تقابلو لأول مرة خلال الحرب سنة 2024، وقت كانوا قاعدين بنفس مركز الإيواء. بهديك الفترة، تشكلت بيناتهن صداقة حلوة، مليانة لعب ووقت ممتع قضوه سوا.
بعد ما خلصت حرب 2024، كل واحد رجع على قريته بالجنوب، وانقطع الاتصال بيناتهن. ومع تجدد الحرب سنة 2026، اضطرّوا ينزحوا مرة تانية.
ما كانوا متوقعين أبداً إنو رح يشوفوا بعض مرة تانية بمركز إيواء تاني، وكأن القدر حب يجمعهن من جديد. أول ما شافوا بعض، بلشوا يلعبوا سوا دغري، وكأنو ما مرّ عليهن أشهر وما شافوا بعض.
هلق بيحكولنا إنهم صاروا رفقة مقرّبين وبيحبوا بعض كتير، ووجودهن سوا بنفس المكان ساعدهن يتأقلموا مع وضع النزوح. كمان بيعبّروا عن رغبتن إنو الحرب تخلص، ويرجعوا على بيوتهن، ويكملوا مدرسة، وإنو يبقوا أصحاب ع طول.
للصراحة، من أهضم القصص يلي شفناه خلال هالحرب!
