هالشب اللبناني بقي بالجنوب كرمال قردته ساندرا!
بوسط كل هالحرب، في قصة بتدفّي القلب من الجنوب. حسين مزيّل من مدينة صور قرر ما يفلّ من المنطقة رغم أوامر الإخلاء، لأنو ما بدو يترك قردته ساندرا لحالها.
بيقول حسين بفيديو: “ساندرا مش مجرد حيوان عندي، هيدي كأنوا أنا عندي طفل”. صار ينام بسيارته، وبينتقل بين المناطق حسب الحاجة، عم يحاول يحمي حاله و قردته ساندرا كمان. بيتهن كان موجود بمنطقة معلّمة للإخلاء، واضطرّوا يتركوه وراهن.
“وين ما روح، ساندرا معي. ما بحطها بمكان خطر”. ساندرا هي السبب الرئيسي اللي مخليته يبقى، مع إنو ناس كتير عم تهرب من المنطقة. صارت الحياة اليومية أصعب، وحتى أبسط الأمور صارت بحاجة لمجهود إضافي.
لما بيطلع يجيب الأغراض، لازم يتأكد إنها بأمان. صار روتينه هلّق متمحور حواليها، من أكلها وتحميمها ليضمن إنها تبقى هادية بأي محل جديد وغريب.
رغم الظروف، ساندرا بتجيب شويّة فرح ع نهاره. قاعدة جنبه بالسيارة وعم تتفاعل مع العالم حواليها، وبتخلي يومه شوي طبيعي. بنفس الوقت، قراره بيعكس وضع ناس كتير: كتار ضلوا بالجنوب لأنه ما بيقدروا يتركوا كل شي وراهن.
لمحتوى أكتر، فيكن تشوفوا قسم #دعم_لبنان على موقعنا!
