فيديو من محاضرة أونلاين بيوثّق لحظة القصف مبارح
انتشر فيديو ع مواقع التواصل للحظة كتير موجعة بتعكس واقع الطلاب بلبنان بظل الحرب، خاصةً بعد مجازر العدو مبارح بالعاصمة بيروت، الضاحية، الجنوب، والبقاع.
كان في محاضرة أونلاين عادية، مادة عن تطوير اللغة الشفهية لطلاب سنة أولى، لحد ما فجأة انقلب المشهد. صوت انفجار قوي، صراخ، خوف، وطلاب عم يحاولوا يستوعبوا شو عم بصير حواليهن. بثواني، الطلاب اضطروا يقطعوا الاتصال ليلاقوا شي محل آمن.
الأستاذة الجامعبة، يلي بتدرّس علاج النطق والصوت، شاركت هاللحظة لتوصل صورة عن قساوة الواقع. الطلاب مش بس عم يدرسوا… هني كمان عايشين تحت تهديد دائم لحياتن. هالفيديو هو جزء من يوميات كتير شباب وصبايا بلبنان. عم بيحاولوا يكفّوا حياتن، يتعلّموا، ويحلموا بمستقبل… بس الحرب عم تفرض حالها بكل تفصيل.
يمكن أصعب شي إنو هيدا الواقع صار “طبيعي” عند كتير ناس. بس هو مش طبيعي، ولا ما لازم يكون. هيدا الفيديو بيخلّي أي حدا يشوف ويسمع، يمكن لأول مرة، شو يعني تكون طالب ببلد عم يعيش تحت القصف.
