نشاطات وأفلام للولاد ببلاش ببيروت، التفاصيل هون
إذا عم تفتّشوا على محل يخفّف شوي عن ولادكن بهالفترة الصعبة، خلّونا نعرّفكن على النشاطات الحلوة يلي عم تعملها Tmarbouta بالحمرا. هالمكان مش بس مطعم وكافيه، هو كمان مكتبة وفضاء ثقافي، ومع تراس أخضر بيعطيكن إحساس إنكن برا عجقة المدينة.
كل ثلاثاء وخميس، بيتحوّل Tmarbouta لمساحة ترفيهية للولاد. نهار التلاتا مخصّص للأنشطة الإبداعية، متل الرسم أو جلسات الحكواتي، جو مليان ألوان وقصص وراحة، وكل ولد بيلاقي شي يحبو.
أما الخميس، بيصير سينما صغيرة للولاد (وللكبار كمان!) مع أفلام ممتعة ومسليّة. والأحلى إنو القعدة بتكون مع عصير طازة وبوشار، يعني جو مريح ولحظات حلوة. وكمان كل هالنشاطات مجانية.
وفيكن تجمعوا أكتر من تجربة بنفس النهار: قهوة، كتاب، نشاط أو فيلم. بعد ما تخلصوا، اختاروا كتاب من المكتبة وتقعدوا تقروا عالتراس الأخضر.
بهالظروف الصعبة والتوتر يلي عايشينو، هالمكان عنجد بيشكّل ملاذ صغير بيعطي الولاد (وللكبار) فرصة يعيشوا لحظات طبيعية وهادية شوي. موجود عالشارع الرئيسي بالحمرا، حد Hamra Juice وقبالة Eldorado، وسهل كتير تلاقوه.
تابعوا صفحتن عالسوشيال ميديا هون لتبقوا ع اطلاع على كل جديد والأنشطة والأفلام المعروضة.
