مين رح يشغّل مطار القليعات الجديد؟ هالشركة ربحت المناقصة!
بعد سنين طويلة من التسكير والوعود المؤجّلة، مطار رينيه معوّض – القليعات أخيرًا بلّش يتحرّك بخطوات جدّية بعد ما صار في مشغّل جديد.
وزير الأشغال العامة والنقل، فايز رسامني، أعلن هالأسبوع إنو عقد تشغيل واستثمار المطار رسا رسميًا على شركة Sky Lounges Services، المتخصّصة بخدمات الطيران والطيران الخاص، والتابعة للكابتن نيكولا ميزاروس.
المناقصة تمت عبر مزاد علني وفق قانون الشراء العام بلبنان، والوزارة أكّدت إنو الشفافية والمنافسة القانونية كانوا أساس العملية.
الصورة من Michel Hallak
ومن وقت ما استلم الوزارة، رسامني حاطط ملف القليعات ضمن أولوياته الأساسية، وهاد العقد بيعتبر أوّل خطوة فعلية وجدّية باتجاه إعادة تشغيل المطار بعد عقود من الجمود.
المشروع مش بس تشغيل مطار… الدولة عم تطرحو كجزء من خطة لتطوير البنية التحتية للطيران المدني بلبنان، وتخفيف الضغط عن مطار رفيق الحريري الدولي، يلي بقي لسنين المطار المدني الوحيد الشغّال بالبلد.
هلق صار الدور على شركة Sky Lounges Services لتحوّل هالمشروع لواقع فعلي. وبعد كل التأجيلات والوعود يلي سمعوها أهل الشمال على مدى سنين، السؤال الأساسي بيضل: هل رح ينجح مشروع إعادة تشغيل مطار القليعات هالمرة فعلًا؟
شو رأيكن؟ وهل بتشوفوا إنو تشغيل مطار القليعات صار ضرورة؟ اكبسوا على قسم #الأخبار لتتابعوا آخر المستجدات.
