ببلاش وللعموم…شط عام جديد بكفرعبيدا!
خبر حلو لعشّاق البحر! أعلنت بلدية كفرعبيدا عن افتتاح شط عام جديد صار متاح لكل الناس ببلاش. هالمشروع بيشكّل إضافة مميزة للبلدة ولمنطقة البترون عمومًا، وبيهدف لتشجيع الأهالي والزوار على ممارسة الرياضة والاستمتاع بجمال الساحل بالبترون.
قبل فترة قصيرة، أنجزت بلدية كفرعبيدا برئاسة المهندس ميشال فغالي ممشى مخصّص لرياضة المشي والركض وركوب البيسكلات، مجهّز ليكون مساحة آمنة ومريحة. ومن الممشى، في مدخل بيوصّل مباشرةً ع شط بحص، بيفتح ع ساحل صخري طويل وروعة بيمتد بمحاذاة البحر.
كمان اشتغلت البلدية على تنضيف الشط وترتيبه، وزوّدته بعدد من المقاعد الخشبية ليتمكّن الزوار من الجلوس والاستمتاع بإطلالة البحر. المشروع رح يضم بعدين كيوسكات أكل بالويك-اند، أجواء عائلية، وكل الخدمات المميزة. الإفتتاح الرسمي رح يكون بعد 10 أيام.
وين بتلاقوه؟ محل ما كان Taiga Resort سابقاً.
شو بميّز كفرعبيدا؟
أما سرّ تميّز هالمكان، فبيرجع لطبيعة كفرعبيدا الفريدة. هالبلدة الساحلية الواقعة جنوب البترون بحوالي كيلومترين، تعتبر من أجمل المناطق البحرية بالشمال. بفضل ساحلها الصخري المميّز، وكهوفها البحرية الطبيعية، ومنحدراتها المطلة على البحر المتوسط.
كفرعبيدا معروفة كمان بأنها وجهة مفضّلة لمحبي السباحة والغوص واستكشاف الحياة البحرية، إضافةً لهواة تسلّق الصخور والتصوير الطبيعي، لأنو بيشكّل التنوع البيئي والبحري فيها تجربة مختلفة وغنية بكل زيارة.
افتتاح شط عام بمنطقة كفرعبيدا خطوة مهمّة بتعزّز حق الناس بالوصول المجاني ع البحر، وبتفتح المجال قدام اللبنانيين للاستمتاع بالطبيعة والساحل بعيد عن كلفة الشواطئ الخاصة المرتفعة، خصوصًا بمنطقة البترون.
