أول حديقة دمج بلبنان، بارك لكل الولاد!

بظلّ النقص الكبير بالمساحات الخضرا العامة بلبنان، مش دايمًا سهل تلاقوا مكان بيجمع كل الولاد ليلعبوا سوا. أمّا بالنسبة للعيل اللي عندها أطفال من ذوي الاحتياجات الخاصة، فالخيارات بتكون محدودة أكتر. من هون، بيجي الخبر الحلو: افتتاح أول حديقة دمج بلبنان للولاد ذوي الإحتياجات الخاصة!

بجورة البلوط، سكويرلز بارك Squirrel’s Park مصممة لتستقبل الولاد بمختلف القدرات، بما فيهن الأطفال يلي عندن صعوبات نمائية، جسدية، أو تعليمية.

مش بس ملعب! هالمكان بيشجّع الولاد يستكشفوا، يتعرّفوا على غيرن، ويتواصلوا مع الطبيعة ببيئة آمنة.

البارك فيها ملعب دمج للكل، هياكل للتسلّق، مراجيح، أنشطة توازن، مسارات بالطبيعة، مناطق للألعاب الحسية، مساحات مفتوحة للركض، وحتى حيوانات مزرعة بيقدروا الولاد يتفاعلوا معن.

هالمكان معمول ليدعم اللعب الحر وتطوير المهارات بنفس الوقت، وبيعطي الولاد فرص يبنوا ثقتن بنفسن، يقوّوا علاقاتن الاجتماعية، ويتفاعلوا مع الطبيعة بعيد عن الشاشات.

الأهل والمرافقين كمان فيهن يستفيدوا من أماكن قعدة مخصّصة لإلن، وفي بالموقع مساحات للتجمّعات العائلية والمناسبات. للمزيد من المعلومات، تابعوهن على إنستغرام.

عبر sarasponda.lb

📍 العنوان

جورة البلوط، حد Chahara Restaurant

اكبسوا هون لحتى تشوفوا الموقع بالزبط.

⏰ الدوام

يوميًا من الساعة 9 الصبح لنص الليل

📞 للتواصل

الرقم: 300 729 78

شو رأيكن بأول حديقة دمج شمولية للولاد مع إحتياجات خاصة بلبنان؟

شوفوا كمان:

متبعين نظام غذائي؟ هالسوق بتلاقوا عندو كل المنتجات الصحية والعضوية!