أحلى سوق ناطركن ع دراج الأشرفية هالويك-اند (الدخول مجاني)
رجع مهرجان Saint Basile Stairs It Returns بنسختو الرابعة ليحوّل درج مار باسيليوس بقلب الأشرفية لسوق مفتوح مليان حياة وإبداع.
المهرجان من تنظيم The Creatives Square بالتعاون مع Achrafieh 2020 وComin Insurance، وبيهدف لدعم المواهب المحلية وتشجيع الناس ع التفاعل مع منتجين و فنانين لبنانية. صار موعد سنوي لمصممين و حرفيين يعرضوا أجمل القطع اليدوية والفنية، وسط أجواء صيفية ساحرة من موسيقى و لقاءات الحلوة.
السوق رح يكون ع مدار 3 أيام من 12 لـ14 حزيران، من الساعة 3 بعد الضهر لحد الـ9 بالليل. ليعطي فرصة للكل يتمشوا ع هالدرج الحلو، يتسوقوا، ويقضوا أوقات ما بتنتسى بالأشرفية. والأحلى من هيك، إنو الدخول مجاني!
الزوار رح يلتقوا بعشرات المصممين يلي رح يعرضوا أحدث إبداعاتن بمجالات الأزياء، مجوهرات شغل إيد، إكسسوارات، وقطع الديكور المبتكرة. كمان رح يكون في حضور لفنانين و رسّامين بيعرضوا لوحات وأعمال فنية أصلية بتعكس روح الإبداع اللبناني.
وما بتكتمل التجربة من دون مأكولات و مشروبات طيبة! ومع الموسيقى والأجواء الحيوية الحلوة، بيصير المهرجان فرصة مثالية تغيروا جو هالصيف.
أكتر من مجرد سوق أو معرض! Saint Basile Stairs هو احتفال حقيقي بالإبداع اللبناني وبالطاقات المحلية يلي عم تترك بصمتها بالمشهد الفني والثقافي بلبنان.
جمعوا رفقاتكن، تمشّوا على دراج الأشرفية، اكتشفوا مواهب وأعمال فنية مميزة، واستمتعوا بـ3 أيام من الفن، الموسيقى، الأكل الطيب والأجواء الحلوة.
