أحلى 6 أسواق أسبوعية بتصير حول بيروت
إذا انتو من النوع يلي بيضل ساعات عم يبرم بالسوق، هيدا الدليل إلكن. لقينالكن أحلى 6 أسواق أسبوعية بتصير حول بيروت!
1. سوق السبت عند Sitt Naila، مار مخايل
كل نهار سبت من الساعة 12 الضهر للساعة 8 المسا، بيتحول البيت الزهري لسوق إبداعي بيعرض فنانين محليين، مصممين، وإبداعات يدوية. مطرح مميز لتكتشفوا هدايا فريدة، حرف يدوية، وبراندات لبنانية.
2. سوق البلد، الحمرا و أنطلياس
هالسوق الأسبوعي بجفينور بيدعم المنتجين اللبنانيين الصغار. سوق البلد بيجمع خضرة وفواكه طازة، منتجات بيتية، أشغال حرفية، وأكل محلّي من مزارعين وحرفيين من كل لبنان.
3. سوق المزارعين Urban Farmers Market، بدارو
سوق المزارعين كل نهار أحد، فيكن تشتروا خضرة وفواكة طازة، مونة، خبز بيتي، عسل، زعتر وأكتر من هيك، وبتدعمو المنتجين المحليين والممارسات المستدامة.
4. سوق الطيب، جسر الواطي
واحد من أكتر أسواق المزارعين المحبوبة بلبنان. هو محطة السبت للخضرة والفواكه الطازة، الأكلات التقليدية، القهوة، والمنتجات البيتية من مزارعين ومنتجين وحرفيين من كل لبنان.
5. يا عيني البلدي، الجميزة
هالسوق المحلي بيركّز على ربط الزباين مباشرةً بالمزارعين اللبنانيين، وبيقدّم إنتاج موسمي، مونة، ومنتجات بيتية كل سبت.
6. سوق الأحد، جسر الواطي
سوق مشهور ببيروت كل سبت وأحد، وما فينا ما نحكي عنو. بتلاقوا فيه شوي من كل شي: قطع ڤينتج، أنتيكات، تياب، كتب، ومنتجات محلّية وكلو بأرخص الأسعار.
نسينا شي سوق أسبوعي من أسواق بيروت؟ خبرونا!
