محمية غزلان ساحرة ناطرتكن بعمق غابات كسروان!

بتعرفوا إنو في محمية غزلان مخبّاية بين أحلى غابات كسروان؟

لبنان مليان أماكن ساحرة يمكن ما بتكون معروفة عند الكل. ومن بين هالجواهر المخبّاية، في محمية الغزلان ببقعتوتة، محل ما فيك تشوف الغزلان عن قرب وتعيش تجربة بتذكّرنا بقصص “بامبي”.

ومع الشوب اللي صار، ما في أحلى من طلعة عالجبال، بعيد عن الرطوبة، لتستمتع بالهوا البارد، وريحة الصنوبر، والرواق.

بقلب بقعتوتة، وع بعد حوالي ساعة من بيروت، ناطرتك محمية مجانية وسط غابة صنوبر خلّابة، مع غزلان أليفة وفضولية بتقرب عليك.

إذا عم تفتش على ضهرة عائلية، بيكنيك بالطبيعة، أو حتى مشوار بسيط لتغيّر جو، هيدا المكان لازم يكون على ليستك هالصيف.

شو فيك تعمل ببقعتوتة؟

صحيح إنو محمية الغزلان لحالها بتستحق الزيارة، بس إذا وصلت لهونيك، ما تكتفي فيها.

بقعتوتة معروفة بلقب “أمازون لبنان”، وبتضم واحد من أجمل مسارات المشي بالطبيعة بالبلد. خلال المشوار رح تمرّ حد شلالات صغيرة، وجداول مي، وتكوينات صخرية مميّزة، وغابات كثيفة بتخلّي كل خطوة مغامرة.

إذا رايح تشوف الغزلان، خصّص كمان وقت تمشي بـ”درب الأمازون”. لأنو عنجد من أجمل التجارب الطبيعية اللي فيك تعيشها بلبنان.

لمزيد من هيك محتوى، فيك تشوف أقسام #بالطبيعة و#جواهر_مخفية على موقعنا للمزيد.

شوفوا كمان:

درب الأمازون بلبنان: هيدي الغابة الغريبة اللي ما بتعرفها!