بعد حظر 40 سنة… رحلات جوية مباشرة بين أميركا ولبنان

بعد انقطاع دام أكتر من 40 سنة، في خطوة جديدة ممكن تفتح الباب قدّام عودة رحلات جوية مباشرة بين أميركا و لبنان.

طلب الرئيس الأميركي دونالد ترامب من إدارته السماح لكل شركات الطيران الأميركية بتسيير رحلات مباشرة ع لبنان، بعد اجتماعه مع الرئيس اللبناني جوزاف عون. بس قبل ما يصير هالشي، رح يخضع مطار رفيق الحريري الدولي ببيروت لمراجعة أمنية شاملة من قبل المسؤولين الأميركيين للتأكد من استيفائه كل المعايير المطلوبة.

الرحلات المباشرة بين البلدين كانت متوقفة من سنة 1985، بعد حادثة خطف طائرة تابعة لشركة TWA خلال الرحلة رقم 847. كانت متجهة من أثينا ع روما قبل ما يتم إجبارها تهبط بمطار بيروت. الأزمة استمرت 17 يوم، وشكّلت وقتها نقطة تحوّل أدّت لتعليق الرحلات الجوية من أميركا ع لبنان.

اليوم عم ينطرح احتمال إعادة فتح هالخط الجوي من جديد. وحتى الساعة، ما في موعد رسمي لاستئناف الرحلات. بعدو مش واضح إذا شركات الطيران الأميركية رح تباشر بتشغيل خطوطها فور انتهاء الإجراءات. هالشي بظل الظروف الأمنية الحالية وتحذيرات عدم السفر ع الشرق الأوسط من الخارجية الأميركية.

بحال رجعت الرحلات المباشرة، فمن المتوقع إنها تسهّل السفر بشكل كبير على اللبنانيين المقيمين بالولايات المتحدة. خاصةً إنو آلاف المسافرين بيضطروا اليوم يقطعوا رحلات طويلة مع محطات ترانزيت قبل ما يوصلوا ع بيروت.

خبرونا، شو رأيكن بإحتمال رجعة رحلات جوية بين أميركا و لبنان

شوفوا كمان:

رسمياً، رحلات العبّارة بين بيروت والبترون بتنطلق هالويك-اند!