قطع أثرية مهرّبة من صور انضبطت بنيويورك وراجعة ع لبنان

لبنان رح يستعيد مجموعة من ألواح توابيت رصاصية قديمة، تمّ التنقيب عنها بشكل غير قانوني بمنطقة صور وتهريبها لبرا البل. من بعد ما تمّ اكتشافها ضمن كتالوغات البيع بنيويورك.

وزير الثقافة غسان سلامة أعلن إنو القطع رح يتم تسليمها للقنصل العام اللبناني بنيويورك طلال ضاهر، بعد جهود المديرية العامة للآثار بالتعاون مع السلطات الأميركية ومكتب التحقيقات الفدرالي الأميركي (FBI) لاسترجاعها.

القطع انكشفت ضمن كتالوغات مبيعات صادرة عن Arte Primitivo، وهي دار مزادات بنيويورك متخصّصة ببيع القطع الأثرية.

وبحسب سلامة، ألواح الرصاص فيها تفاصيل فنية وزخرفية وتقنية بتشبه التوابيت الرصاصية اللي كانت تنصنع بورش مدينة صور القديمة. و تصاميمها كمان بتشبه قطع تانية اكتشفت جوا مدفن روماني قديم تحت الأرض بدبعال. يعني على بعد حوالي 14 كيلومتر جنوب شرق صور.

وهيدا التشابه بيدعم احتمال إنو القطع مرتبطة بمنطقة صور. الأدلة المتوفّرة بتشير إلى إنو تمّ استخراجها من المنطقة خلال عمليات تنقيب غير شرعية.

سلامة أشار كمان لأهمية استرجاع هالقطع، خاصةً إنو منطقة صور غنية كتير بالآثار وتعرّضت لدمار كبير بالفترة الأخيرة بسبب القصف.

وإسترجاع هالقطع جزء من جهود لبنان لحماية تراثه ومكافحة تهريب القطع الأثرية. وأكدت وزارة الثقافة والمديرية العامة للآثار إنو رح يكمّلوا العمل لاستعادة أي قطعة أثرية لبنانية يثبت إنّها ضهرت من البلد بطريقة غير قانونية.

نحن مبسوطين إنو قطع من تاريخ صور العريق عم ترجع لمحلها الأصلي.

شوفوا كمان:

بجهود السفيرة هند درويش…قلعات جبل عامل ع لائحة التراث العالمي!