إيلي صعب يتعاون مع H&M بمجموعة جديدة لكل يوم!

أعلنت دار الأزياء اللبنانية العالمية إيلي صعب عن تعاون جديد مع شركة الأزياء العالمية H&M، لإطلاق مجموعة بتجمع بين أسلوب الدار الراقي وطابع H&M المعروف بالملابس اليومية.

شو منعرف عن هيدا التعاون؟

المجموعة مستوحاة من عالم إيلي صعب، وبتضم ملابس وإكسسوارات بتستوحي من أسلوب الدار. بس بتكون أقرب للبس اليومي، مقارنةً بتصاميم الـhaute couture المعروفة فيها الدار.

التعاون بيجمع بين علامتين عندن حضور مختلف بعالم الموضة. إيلي صعب معروف بتصاميم الـhaute couture وفساتين السجادة الحمرا. أما H&M من أكبر شركات الـfast fashion عالميًا، وبتعتمد على طرح مجموعات جديدة بشكل مستمر وبأسعار أقل.

هيدا النوع من التعاون مش جديد بالنسبة لـH&M. الماركة سبق وتعاونت مع عدد من المصممين و العلامات العالمية لتقدم تصاميم لجمهور أوسع.

بالنسبة لإيلي صعب، التعاون بيفتح المجال قدّام الدار لتوصل لشريحة أكبر من الناس. هالشي خلال مجموعة مختلفة عن العادة للـcouture، مع الحفاظ على بعض العناصر اللي بتميّز أسلوبها.

هل رح نقدر نشتريها من لبنان؟

بالنسبة للجمهور اللبناني، المجموعة ما رح تكون متاحة بشكل مباشر بمتاجر H&M بلبنان. خاصةً إن العلامة ما عادت موجودة بالسوق بلبنان.

أما من ناحية التصاميم اللي انكشفت لحد هلق، فهي بتتجه أكتر نحو الأزياء اليومية.

وبين الـluxury والـfast fashion…

التعاون بين إيلي صعب وH&M بيحط علامتين من عالمين مختلفين تحت سقف مجموعة وحدة. من جهة، في الـluxury fashion، اللي بيركّز على التصميم و الحرفية والقطع المميّزة. ومن جهة تانية الـfast fashion، اللي بيعتمد على إنتاج كميات كبيرة من تصاميم وطرحها بسرعة وبأسعار أوفر.

وهون طبيعي تنطرح أسئلة عن كيف رح تنعكس هوية إيلي صعب على مجموعة بهالنموذج. وأديه رح تكون القطع مختلفة عن باقي مجموعات موجودة بالسوق، خاصةً إن المجموعة مش رح تكون متاحة مباشرة بلبنان.

وبانتظار إطلاق المجموعة رسميًا، يبقى التعاون خطوة جديدة ضمن توسّع إيلي صعب خارج نطاق الـhaute couture، وتجربة جديدة لـH&M مع واحد من أبرز مصممي الأزياء اللبنانيين عالميًا.

شوفوا كمان:

لكل محبّي اللبن اليوناني، هيدا المحل الجديد ببيروت إلكن