٤ مطاعم شهية ببيروت للمطبخ الهندي

مين ما بحب يجرب مطابخ جديدة ويغير من فترة للتانية طعمة تمو؟ فينا نشم عبر الشاشة الروايح الطيبة، ونحس بطعم الحر عم يقعص لسانا… زملائي يلي ورا المكاتب هلأ وعم بشوفوا غيرن رايح جايي، صار فيكن تجيبوا كل الطعم الهندي الساحر لعندكن من خلال أربع مطاعم بيروتية شهية بترسم صحونا بأشكال بديعة وبتعتمد بوصفاتا دمج طعمات من أنحاء مختلفة من العالم.

١.دجاي

زغير، قريب من كليمنصو، بيقصدوا يلي بفتشوا على عروض رائعة للغدا. بالمحل في طاولة وحدي بس، فيا تجمعك مع أصحابك أو تتشارك القعدة مع ناس أول مرة بتشوفن. فريق العمل ضحوك ولطيف، وبيستقبلك بحرارة كل مرة بتزورن. رح تلاقي نفس الطريقة بالتعامل لما تتصل وتطلب يوصلولك الأكل عالبيت. لايحة الطعام بتمزج بين الهندي والتايلندي وبتضمن أهم المكونات الطيبة يلي بيتميزوا فيها هالمطبخين: الكاري الساموساس والشعيرية الآسيوية. إذا ما كنت من هواة الحر، سآل عطول قديش في بهار بالأكل قبل ما تقرر شو بدك. هون فيك تسأل عن كل شي حتى تعرف عنو أكتر، أكيد رح تلاقي جواب يرضي حشريتك. مننصحك بطبق الدجاج بالزبدة التقليدي. ما بيتفوت!

العنوان: شارع مكسيكو، الحمرا

٢. الهندي

ععين المريسة، هوي من الأماكن الراقية عالشط البيروتي الخلاب. التصميم الفخم والألوان المشعشعة رح تخليك تتمتع بتجربة هندية حقيقية من قلب مدينتك الأم، بيروت. المتل بقول: "المكتوب بينقرا من عنوانو"، وهيك اسم المحل يلي بيعكس هويتو ابتداء بالـ"دال" (طبق العدس التقليدي)، وصولاً للـ "جولاب جامون" (الدونت المبتكرة عالطريقة الهندية). أسعارو شوي أغلا من غيرو، وهوي مخصص للشغوفين بالمطبخ الهندي.

العنوان: اوتيل البالم بيتش، عين المريسة

٣. غات غريلد

بفرن الشباك، هالمطعم الزغير كمان بيعتمد الدمج بوصفاتو وبخليك تحس إنك داخل عالم إلكتروني حي. الخدمة كتير سريعة وفريق العمل سوبر حبوب. أما بالنسبة للايحة الطعام، فهني بقدموا الأكل الهندي، الآسيوي والمتوسطي. عندن دجاج عطريقة التكا ماسالا، الكبب، والحمص المعروف عنا. كل الوقت وانتا قاعد رح تشعر بالنبض السريع عم بحرك كل شي حولك. أما إذا طلبت أكلاتك عالبيت، رح يوصلوك بطريقة مرتبة، بعلبة عملية بتفصل بين الأصناف المختلفة. النكهات بتطير العقل وبأسعار كتير معقولة.

العنوان: بالقرب من جامعة الحكمة، فرن الشباك

٤. رزيرفوار بيروت

بتفوح منو رائحة العطور الغنية. هوي برملة البيضا، بعيد شوي عن عجقة الشارع العام. رح تخوض فيه تجربة هندية رائعة والعاملين رح يستقبلوك بالترحاب. بتشوف علايحة الطعام الأطباق الهندية التقليدية متل الساموساس، البانير، التندوري والدجاج بالزبدة. ما تروح عليك التحلاية الهندية، عمول حساب تخليلا شوية محل قبل ما تشبع.

العنوان: شارع فريد طراد، بناية المطعم الصيني، رملة البيضا

بيروت غنية بالمطاعم يلي بتعمل مطبخ دامج، ومش بس هندي عفكرة، كمان من غير بلدان. يلي عم بجربوا يخففوا بيتزا وبيرغر ضروري يحطوا هول المحلات عراس الليستا.<br>

ترجمة: رنا قاروط