١٠ مطارح لازم تزورا بلبنان

كتير منا حاطت ليستا بالمطارح لبدو يزورا قبل ما يموت، بس قدي قولكن في من هالمطارح بلبنان؟ بلدنا مخبي كتير كنوز، وعجايب طبيعية، ومطارح كتير حلوة لازم تزورا قبل ما يفوت الاوان. إذا المرة الجاي قررت تروح رحلة أو بدك تبعد من العجقة، نقي مطرح من هالمطارح واكتشف قدي هالبلد في أشيا حلوة في.

١. راس البياضة – الناقورة

موجود بمنطقة البياضة المشهورة ببحرا الأزرق النظيف. أحلى منظر هونيك هو صخور راس البياضة لفيها كتير كهوف ناطرينك لتكتشفن. بعيدة عن جنوب صور ٢٠ دقيقة تقريبًا.

٢. محمية جزر النخيل الطبيعية – طرابلس

موجودة عساحل طرابلس وفيها ٣ جزر. من شهر تموز لأيلول، فيك تاخد شختورة وتروح تشوف هالجزر الحلوين لعايشين فيها حيوانات كتير متل السلحفات، والأرانب، والفقم النادرة، وأكتر من ٣٠٠ نوع من العصافير المهاجرة.

٣. عيون السمك – عكار

موجودة بمنطقة وادي نهانام، بجنوب ضيعة قايت، وهي المنطقة الجبلية بعيون السمك. فيها بحيرة حلوة وشلالات. روح عليها بأشهر الربيع لتمشي حد النهر وتقطف الورود.

٤. وادي قاديشا – وادي قنوبين

كمان معروف باسم وادي المقدّس. وادي قنوبين هو واحد من أعمق وأحلى الوديان بلبنان. فيك تلاقي في كهوف، ومصليات، ونصب، وأديرة محفورة بالصخور. وإذا كفيت لاخر الوادي، رح تحب كتير تعمل بيك نيك حد النهر.

٥. الأثار البحرية – صور

صور هي مدينة إلها تاريخ فينيقي حلو كتير، وفيها أثارات رومانية وسوق بيرجع للقرون الوسطى. موقع الباس التراثي بصور بأكّد قدي صور محافظة على أكبر وأهم الاثارات متل ساحة سباق الخيل الروماني، والمقبرة الجماعية الكبيرة، والطرقات الرومانية لبعدا ما تغيّرت، والقناة الرومانية، والقوس الكبير.

٦. السور الفينيقي – البترون

في كتير أشيا فيك تشوفا عساحل البترون، بس أشهر شي هونيك هو السور الفينيقي القديم لطولو ٢٢٥ م. زمان كان هيكل طبيعي رملي، بس بعدين إجو الفينيقيين دعموه بصخور واستعملوه ليحمو حالن من العواصف البحرية والمحتلين.

٧. شلالات الزرقا – بعقلين

بعقلين هي ضيعة لبنانية حلوة كتير بالشوف. أكتر شي مشهورة بالشلالات. الشلالات الزرقا بتشبه الجنة ومننصحك تزورا بأيام الأسبوع بالصيف لمّا يكون المطرح لبيعملوا في بيك نيك مش معجوق. كمان فيك تشوف صور للشلالات عصفحة الانستغرام:

٨. تحت الريح – أنفه

أنفه هي مدينة ساحلية بتبعد ١٥ كم عن جنوب طرابلس. بتذكرك شلاياتا الزرقا والبيضة والجو الحلو لفيها بالجزر اليونانية. شوف الشلايات هونيك وبعدين انزل عبحر تلّة الريح المعروف كأحلى البحور المجانية بلبنان.

٩. وادي ونهر جنة شوّان – جبل موسى

لازم تمشي لتوصل عالنهر، بس المناظر لرح تشوفا بتحرز. هي من أحلى المطارح بقضاء جبيل. زورا بالربيع أو بأول الصيف لما يكون النهر بعدو مليان ماي، والجنينة بتكون بعدا نظيفة وما حدا إجا عمل بيك نيك ووسّخا.

١٠. معرض رشيد كرامة الدولي – طرابلس

هالمعرض صممو المهندس المعماري البرازيلي المشهور أوسكار نيامير بالستينات. لمّا بلّشت الحرب بلبنان بال ٧٥، وقفو العمار وما عادو كفو فيه. اليوم، مساحتو لبتوصل ل ١٠٠٠٠ هكتار فيها ١٥ بناية ومساحات خضرا كبيرة مهجورة، بس بعد في ناس بتحب المطرح وبتجي لتشوف العمار لفيها!