في كتير أسواق بلبنان بيغلب عليها الطابع التراثي بتذكرنا بأيام زمان، هاالأسواق العتيقة والأبنية الأثرية اللي صرلها اكتر من ألف سنة واللي بعدها محافظة على شكلها التراثي بتشدك من بعيد، ما فيك لما تمشي فيها ما تشم ريحة جدودنا وجدود جدودنا وتسترجع التاريخ اللي مر على هيدي الأسواق، هالتاريخ اللي برجعنا لزمن ما كنا عايشين فيه، بيتميز بكل أنواع البساطة، هيدا الزمن الجميل اللي ما بيرجع.
خلونا نرجع بالزمن ونتذكر بعض الأسواق الشعبية القديمة بلبنان.
أسواق بيروت القديمة:
سوق بيروت القديم
كانت الأسواق الشعبية موجودة بكثرة بوسط بيروت أو “البلد” أو “ساحة الشهداء” وكان بوقتها في أكتر من سوق شعبي متل سوق النورية، سوق الطويلة، سوق إياس، سوق سرسق وباب ادريس.
باب ادريس
سوق الطويلة
هيدي الأسواق اللي عرفتها بيروت بفترة الخمسينات لمطلع السبعينات قبل ما تغير الحرب معالمها وقبل ما يتغير شكل السوق القديم ويطغى عليه مظهر الحداثة.
سوق صيدا القديم:
هالسوق اللي الو مكانة خاصة عند الصيداويين كونه رمز من رموز تراث الآباء والأجداد، هيدا السوق الموجود فيه الدكاكين الحرفية وخان الإفرنج واللي بيجذب السياح بفنه التشكيلي وألوانه المختلفة منلاقي فيه المنجد، اللحام، الكندرجي، الخياط، الكل تعلم مهنتوا من جدودوا وكل شي بتطلبوا موجود بهالسوق من مجوهرات، تحف، تياب، وأطيب المأكولات وبيتألف من 3 أقسام اللي هني الخان الكبير والبيت القنصلي و الخان الكبير.
سوق طرابلس:
أسواق طرابلس القديمة هي من أهم الأسواق التراثية بالشرق الأوسط لأن بعود تاريخ نشأتها لأكثر من ١١٠٠ سنة وقاطع عليها عدة حضارات اللي هني الحضارة اليونانية والعربية وبعدها الصلبيين والمماليك وأخرشي الأتراك العثمانيين، هالسوق كان عبارة عن مركز تبادل تجاري متطور بضم غرف نوم، وإستراحة للتجار، وقاعات لعقد الصفقات التجارية وبعدو السوق محافظ على شكله القديم من دون أي تغيير، كل سوق من هالأسواق الشعبية بيتميز بشي متل سوق الصاغة، سوق البازركان، سوق النحاسين، سوق القشطة، سوق العطارين، سوق التربيعة.
سوق جبيل:
لأسواق مدينة جبيل القديمة طابع مميّز، هالمدينة اللي تعتبر من أقدم المدن في لبنان، واللي بتضم أهم الحضارات، بيتميز سوقها بطابعوا العريق والتقليدي، وبضم المحلات اللي بتزدحم بالصناعات اليدوية والحرف القديمة والتذكارات والقطع الأثرية و الزجاج الملون و المجوهرات الفينيقية وقبّعات القش والحرفيات، إضافة للألبسة والعبايات القديمة واللوحات القديمة، هالأسواق القديمة بعدها محافظة على سحرها الخاص وتحوّلت بالأعوام الأخيرة مقصد لجميع السياح.