٦ إشيا ما رح تفهما إلا إذا عندك إخت!

المغامرات لمنعيشا مع أخواتنا بحياتنا ما بتخلص بس في كم شغلة مستحيل ما تخطر ببالك بس تتذكر الأيام لقضيتها معن.

أنا أكيدة كل حدا منكن عنده إخت رح يتذكر كتير قصص صارت معو ويضحك، رح نجرب نذكركن ب6 مواقف أكيد صايرة معكن قبل:

١. “مش هيدا الجينز إلي؟!”

مستحيل ما يكون عندك إخت وما تكوني مارقة بهالموقف قبل… بكون عندا تياب أكتر منك بس دايما بتشوفيها لابسة تيابك! بس بدي أعرف مين لخبّرا إنو تيابي مكتوب عليهن “فيك تلبسيني”!

٢. “بس يا فجعاني مش عأساس منك جوعانة؟!!”

كل ما تقرر تطلب أكل بتسألها إذا عبالا تاكل ودايما بكون جوابا “لا ما بدي إنصح”! ما بيلحق يوصل الأكل بتفتح شهيتا وبتخلصلك كل أكلاتك!

٣. “تتذكر ب ٢٠٠٨ لما ما قبلت تجيبيلي شارجيري بطريقك؟”

عندا ذاكرة خيالية… كل ما تقرر تطلب منا شي بتنكشلك كل ماضيك!

٤. “قومي هيدا مطرحي”

بتحسا مراقبيتك طول النهار بس تقرر تروح تجيب شي لتاكلو بترجع بتلاقيها قاعدة مطرحك! بين كل المطارح بالبيت ما بتنقي إلا المطرح لكنت قاعد فيه!!

٥. “جيبيلي معك ماي.. وكمان بطريقك جيبيلي تلفوني”

بتكون ناطرتك من نص ساعة لتقوم وبتقرر لحالا إنك رايح عالمطبخ وبصيرو الطلبات ينزلو متل الشتي وأنت بتكون قايم لتجيب شغلة من الطاولة لحدك!

٦. “فوتي انستا عمليلي لايك وكومنت هلأ بسرعة”

أنت بتفكر عم تطلب منك تعمل لايك وكومنت بس هيدا بكون أمر وجرب قول لا!