ذا دوم: اوتيل من غير عالم بمنطقة كفرذبيان

تخايلوا معنا.

وصلت الشتوية وصار الثلج على الأبواب. غطى الجبال والوديان وصار اللون الأبيض على مد عينكن والنظر. وانتو قاعدين بقبة مقززة، قدام الدفاية، وقادرين تشوفوا كل هالجمال من عندكن.

طب شو رأيكن إنو ما في داعي تتخايلوا هاي التجربة الساحرة، لأنه فيكن تعيشوها.

اوتيل ذا دوم بمنطقة كفرذبيان هو بعيد كتير عن الأوتيلات يلي معودين عليها.

بدل الغرف، ذا دوم بنيمكن بقبة كلا قزاز لتقدروا تشوفوا كل شي حوليكن.

من السماء للجبال للطبيعة، كلو قبالكن.

هاي التجربة ما بتتفوت بايام الثلج، ما فينا نوصف اديه بكون المنظر سحري.

النومة جوا كتير مريحة، والقعدة والترويقة وفنجان القهوة من قلب القبة الهن طعمة غير شكل.

أكيد في برادي لحتى تسكروا عحالكن كرمال الخصوصية، بس انتو وفايقين بتخلوهن مفتوحين وبتتمتعوا بالجمال يلي موجود بكل زاوية.

كمان عندن جاكوزي لتسترخوا وبيعرضوا أفلام كرمال تكمل القعدة.

مين بتاخدوا معكن على هيك مشوار؟