أشهى الأكلات الشعبية إلي لازم تجربوها بطرابلس

كل منطقة من مناطق لبنان بتشتهر بأكلات شعبية ولذيذة أما طرابلس موضوع تاني. فهي تاني أكبر مدينة بلبنان وبتتميز بتاريخها العريق وحلوياتهااللي بعود عمرها لمئات السنين اللي ما بتتصنع إلا بطرابلس والأكلات الشعبية المتنوعة.

رح نقدم بعض الأكلات والحلويات الشعبية الموجودة بطرابلس:

حلاوة الجبن:

هي الأشهر والأطيب بطرابلس، بعود عمرها لمئات السنين هالأكلة اللي تخصصت فيها مدينة طرابلس والمعروف عنها انه رغم بساطة المواد الأولية الخام اللي بتستعمل بصناعتها متل السميد والجبن البلدي، إلا أنها بتحتاج لدرجة عالية من الدقة بالمد و التقطيع واللف.

المغربية:

تعتبرمن الأطباق التراثية التقليدية والشعبية بمدينة طرابلس، الطلب عالمغربية كتير كبير لأنها أكلة شهية، وسريعة وتعتبر أفضل وجبة غذاء وبتكفي للنهار كله، و بتنباع بسندوتشات أو بالصحن، مع الكبيس.

اللحمة بعجين الطرابلسية:

بتتقدم مع دبس الرمان ولا أطيب من هيك أكلي مصنوعة من العجينة الرقيقة البتقرمش مع حشو اللحمة والصنوبر البتشهي، وهي مختلفة كلياً عن بيروت وعن البقاع فاللحم مطعّم برُب الرمان الطبيعي اللي بيعطيه الطعم واللون المميّز.

مفروكة الفستق:

بطرابلس في أكلة ما فيك ما تدوقها هي المفروكة، هيدا الطبق اللي توارث من جيل لجيل بطرابلس بيتألف من السميد المحمص والمخفوق بالقطر والقشطة وحبوب الصنوبر واللوز ومربى الزهر، هالأكلة اللي بتتميز بلونها الأخضرالشهي.

المعجوقة:

تعتبر المعجوقة من أطيب ترويقة سخنة، وبتتقدم داخل كعكة طرابلسية، على نارخفيفة بتنوضع قطع الجبنة و بتتقلب على اللوح الحديدي، وبينضفلها بعض السميد، وبينسكب عليها ماء الزهر و بتتمدد العجينة بالهواء، و بتطقطع لقطع متوسطة، وبتتقلب بوعاء السكر الناعم.

حلاوة الرز:

حلاوة الرز اسمها بدل عليها بتتألف من الرز والجبنة البلدية وماء الورد والزهر المقطّر محلياً وبتشبه بشكلها حلاوة الجبن.

الكعكة الطرابلسية:

أفران الكعك الموجودة بطرابلس لأكتر من ١٠٠ سنة المختصة بصناعة هالكعكة الطيبة والرخيصة والمشهورة بطرابلس، بتتقدم محشية بالجبنة السايحة السخنة المحمصة على الحطب والمدهونة بالذبدة وفينا نزيد عليها شوية حر عند الرغبة.