١٣ شغلة رح يفهمها كل شخص بيروتي

داعوق، سنو، عيتاني، كريديه، منيمنه، دوغان، حوري، وكل العيل الباقية، شوفوا هالعلامات يلي بتدل انك من عيله بيروتية.

١. الواجبات أهم شي

عيلتك دايماً لازم تتأكد انك عملت كل الواجبات، من العزاء للعزيمة!

٢. بتعشق المفتقة

وستك الوحيدة يلي بعدها بتعملها، أو بتطلب من حلويات المكاري.

٣. قهوة الروضة أحلى محل للقعدات الطويلة

أرغيله مع أكل سعره منيح…هيدا الحلم البيروتي.

٤. إنت مقتنع إنو بيروت فيها سبع عيل بس!

وفي كتير جدل حول هالموضوع

٥. العزاء محل كتير مناسب لتحكي مع الكل وتسأل عن أحوالهن

ويمكن كتير تلاقي الإم يلي بدا تجوز إبنا وما عارفي كيف

٦. دايماً في دراما ومشاكل بين العيل البيروتية

وفي قصص قديمة عن مين غلطان مع مين.

٧. عندك تفسير كتير دقيق عن شو هي بيروت

بتعرف بالضبط بأي شارع بتبلش ووين بتخلص

٨. إذا ما أكلت لهلكت بالعزيمة، العازم أكيد رح يزعل

“ما أكلت شي والله عيب!”

٩. عيلتك ياما إنعزمت من قبل الحريري أو المخزومي على شي افطار.

١٠. بتعرف الفرق الحقيقي بين المجدرة و المدردرة

١١. كل البيارته بيعرفوا بعض!

“اه هيدا خالد إبن وسيم”

١٢. إنت وستك مأكدين إنو هي بتعمل أطيب معمول

ويلي بالسوق ما بيسوى.

١٣. بتعرف إنو بيروت مكانك الأول والاخير!