٧ أغاني قديمة بتحاكي الوضع الحالي بلبنان
رغم مرور سنين وسنين على هل أغاني لكن ما بتروح عن راسنا وخاصةً بهيك أوضاع صعبة، كأن الزمن واقف عنا أوحتى بلش يرجع. شو في غير الأغاني لتعبر عن وضعنا؟
١. رغم مرور أكتر من ٢٠ سنة على غنية “صارت سنة الألفين” لغسان الرحباني لكن هل غنية بعدها بتعبر عن وضعنا الحالي: مجاعة، ما في شغل، ما في شباب مرتاحة، الطرقات بالويل، ما في شجر ولا بيترول… بس ما تخافوا في زعيم!
٢. “مشوار رايحين” لوحيد جلال و رونزا بتحكي عن المشوار لي بيعملو اللبناني كل يوم بهل أزمة “ويمكن ما في فرق مش مهم وين نروح المهم نروح مشوار لنلاقي بنزين ودوا، ولنلاقي لي بدنا يا يمكن نضطر نبرم صوب الغرب وصوب الشرق أو حتى نبرم كل لبنان.
٣. “شو هل ايام” لزياد الرحباني بتعبر عن وضع كل لبناني بظل هل أزمة و”كنو المصاري قشطت لحالها” بعد أزمة الليرة وإجراءات البنوك: شو بدنا نخبرك يا ماري أنطوانيت، بسكويت ما عم نلاقي!
٤. “كلن عند سيارات وجدي عندو حمار” شكلها إيام الحمير راجعة بعد هل أزمة، بس قولوا الحمدالله كتار الحمير بهل البلد ما رح ننقطع.
٥. “دورها” لزياد الرحاني من أطرف الأغاني لي بعدها بتعبر عن وضعنا الحالي “وهيدي خيي القصة طويلة” وشكلها الأزمة ما رح تنحل على إيامنا وشكلها هل سيارة مش رح دور إذا مكملين هيك: ضحاك بكرا بيرجع البلد!
٦. بتحس فيلمون وهبي بغنية “سنفرلو عالسنفريان” عم يحكي عن كل حدا بعدو لاحق زعما الفساد على العمياني وبعد ناقص يقولولنا “يا عالم ذنبو مغفور ولو قال النحلة دبور ما من نقلوا إلا تري بيان”.
٧. وكأن صباح بغنية “يا طير الطاير” عم تغني للدولار لي طار من جيوبنا : “يا طير الطاير قلوا حق الفرقة اشتقتلو ودخلك على دربي دلوا”: ودخلك على دربي دلوا!
