تعرفوا على قرية أكروم المنسية بشمال لبنان

من بعد الحريق الكبير لي صار بالقبيات وعكار، حبينا نضوي على جمال هل منطقة المنسية بلبنان ومشوارنا رح يبلش بأكروم: أرض الكرم والزهور.

جبل أكروم منطقة شاسعة مألفة من سبع ضيع، أبرزها ضيعة أكروم وكفرتون.

بتوقع قرية أكروم بشمال عكار وبتتميز بجمال مناخها وتنوع تربتها وأثارها الرومانية.

يقال تسمية أكروم جايي من اللبناني أو الفينيقي القديم “كروم” يلي بدل على غنى المنطقة بكروم العنب وفي البعض بقول جايي من الآرامي من فعل “جرم” يعني كسر.

بتبعد ضيعة أكروم 45 دقيقة عن القبيات وحوالي 3 ساعات ونصف عن بيروت.

أكروم والمناطق لحواليها كانو التوجه الأول للحج عند الرومان بلبنان، كرمال هيك منلاقي معابد وآثار معابد ومعاصر عنب وزيتون لا تعد ولا تحصى.

أهم موقع أثري بأكروم هوي المعبد الروماني القديم لي ما زالت قنطرتو شبه كاملة رغم كل الحروب والفتوحات لي شهدتها المنطقة، يقدر يكون عمرها فوق ال2000 سنة: ما في أجمل!

هل معبد فيو مذبح، قدس الأقداس، مقاعد من حجر، قناطر، محادل، أثار مدرج ومعصرة نبيد من الأقدم بلبنان وعلى الأغلب تكون الأقدم إلى جانب معصرة صور لي مؤخرا جرت الدراسات عنا .

بس تمشوا شوي بتلاقوا أثار معابد وحجار قديمة منسية مغلفة بشجر سنديان داير من دار: الأرض مدهبة، السنديان بفيي وحجار بتحكي ألف قصة وقصة.

المنطقة الخضرا الأكبر بلبنان موجودة بعكار وأكروم الضيعة وحدة من هل مناطق وبتستحق زيارتكن ومحبتكن!