٦ محلات كتب مستعملة على انستاغرام

إذا عبالكن تمرقوا الوقت لي بتنقطع في الكهربا بشي مفيد، ما في أحلى من القراية والكتب خاصة بوضح النهار وبفي الطبيعة. كرمال هيك جمعنالكن ٦ مواقع على انستاغرام ببيعوا كتب مستعملة باللغة العربية وبأسعار منيحة ونوعية جيدة.

١– بوك بزار

بوك بزار مكتبة أونلاين بتبيع كتب مستعملة وجديدة بأسعار مغرية. معظم الكتب المتوفرة كتب علمية وبحثية.

٢– مكتبة حلبي

هل صفحة بتبيع كتب باللغة الإنكليزية والعربية، عندن إصدارات جديدة ومستعملة وطلبكن بيوصل بسرعة. وإذا عبالكن تغيروا جو فيكن تنزلوا على بيروت وتقروا بكنف المكتبة أو تستكشفوا رفوفها.

٣– يوزد بوكس ثريفت ليبانون

عندن مجموعات من الروايات المشوقة والمترجمة للغة العربية وفيكن كمان تلاقوا كتب باللغة الإنكليزية.

٤– بوب أب بوكستور

هل صفحة بتبيع كتب عربية وإنكليزية وعندا تشكيلة واسعة وكبيرة، بتلاقوا عندن كل شي بيخطر على بالكن.

٥– مكتبة جميلة

بتلاقوا عند هل صفحة أهم الكتابات العربية المعاصرة إلى جانب كتب روحية وروايات مترجمة.

٦– بوكستور ليبانون

هل صفحة بتسمحلكن تبيعوا وتشتروا كتب مستعملة أونلاين. التكشيلة كبيرة ومتنوعة، وعندن كتب بالإنكليزي والفرنساوي كمان.