سافر بلبنان: تعرفوا على جواهر الشمال المخفية

لبنان كلو على بعضو حلو. ولأن كل يوم منكتشف محل جديد وكنوز مخفية، حبينا نعرفكن على محلاتنا المفضلة بالشمال لي ما حدا بيعرفها إلا أهل الشمال لتعرفوا وين تروحوا المرة الجاية.

1. غابة العزر، الأموعة

إذا عندك مشوار صوب القبيات، ما عندك عزر ما تروح تمشى بهل غابة الساحرة وخاصةً وقت الخريف. بتحس حالك منك بلبنان، ريحة الأرض بتبرد القلب.

2. دير مار شليطا، القبيات

هل محل الهادي حتى الحجارة في بتحكي. بتحكي عن الماضي والحاضر وكل شي ضاع بيناتن. بس تخلصوا زيارتكم، رح تستقبلكن تانت لوريس وضيفكن قمح وتحكيلكن حكاية هل مكان.

3. معمل الحرير، القبيات

ما فيك تشبع من هل ضيعة الحلوي كرمال هيك لازم تزور معالمها التراثية وتحس بالعظمة، هل معمل أكتر من حلو رح يردك للقرن الماضي بهندستو وحجارتو. وإذا التقيت بدكتور ضاهر، ما تنسى تسألو عن القصة الشيقة لي ورا هل مكان.

4. بحيرة بنشعي، زغرتا

رح تروق أعصابك بهل محل وتنسى همومك. ما في أحلى من منظر الطبيعة وصوت المي وألوان الخريف.

5. متحف جبران، بشري

هل درج بذكرني بطفولتي وبكل شي حلو عشتو. المنظر بياخد العقل ومشرف على الوادي وأكيد أحسن مكان لتاخد أجمل الصور.

6. مزار مار الياس، حدشيت

جوهرة مخفية بحدشيت. أول مرة زرت هل مزار حسيت بدفا وحب ما بينوصفو. من بعد أول مرة، ما فيك ما ترجع تجي. الشي لي بميز هل مكان إنو بطل على جبال إهدن المجيدة من ميلة وعلى وادي قنوبين المبارك من تاني ميلة: جنات على مد عينك والنظر.

7. جامع المنصوري، طرابلس

الحجارة بتحكي عظمة. مكان مثالي للهدوء والتأمل. ما تنسوا تجيبوا الكاميرا معكن.

8. سوق طرابلس العتيق، طرابلس

شو حلو هل سوق، شو حلوين الناس لي في، بيحسسوك بالحب والعنفوان وريحة لبنان من دون حتى ما يحكوا.

9. درج الأمل، طرابلس

ما فيك تفل من طرابلس من دون ما تزور شارع الأمل لأنك رح تحس بالأمل من ورا الألوان الفرحة وألوان الطبيعة. فيكن تاخدوا كمان أجمل الصور واللقطات.

10. دير حماطورا، الكورة

بتتذكروا غنية وديع الصافي: جنات الله راسمها، هل محل هيك، جنة ودوا لكل أحزانكن.

11. آثارات رشدبين، الكورة

ميلوا على رشدبين وتعرفوا على هل كنز المخفي. المنظر بياخد العقل خاصةً وقت المغيب.

12. بيوت مزيارة، مزيارة

مزيارة ضيعة حلوى كتير، بإيام الحرب هاجر الكتير من سكانها وبس رجعوا عمروا أجمل البيوت ذات هندسات خارجة عن المألوف. برموا الضيعة وتفرجوا على بيوتها وتصوروا.

13. الجيتي، الأرز

يمكن الحكي ما بعبر عن جمال هل مكان. وأكيد لو جتمعوا كل لغات العالم ما رح يقدروا يعبروا عن سحر هل جوهرة. بس تطلعوا بتفهموا عن شو عم إحكي.

14. حرش إهدن، إهدن

بهل غابة رح تعيش الخريف وتحس بالطبيعة وتشعر بالهدوء، يمكن هيدا الشي الوحيد لي إنت بحاجة لإلو هلق.

15. معصرة إكسير، البترون

شو في أحلى من كاس نبيد بهيك طقس؟ وشو في أحلى من ريحة النبيد لي عم ينعصر ويتخمر؟ كاسة نبيد وحدة كافية لدفيلك بطنك وقلبك كمان. وأكيد رح تستمتع بجمال البترون وسحرها.

وإنت شو محلك المفضل بالشمال؟ شاركنا بخانة التعليقات.