37 شغلة بيفهمها كل لبناني بحب الضيعة

أنا وعم إكتب رح إتذكر ضيعتي الحلوي والذكريات لي ما بنسيها…

1. ما في أحلى وأدفى من بيت الضيعة ولو الدني برا عم تتلج والطقس جليد.

2. بيت التيتا والجدو بالضيعة هوي أكتر بيت فيو حب ودفا بالدني وبس يروحوا من هل دني بتبقى ريحتن بكل زاوية.

3. أكلات التيتا أطيب شي بتاكلوا بحياتكن وخاصةً طبخات الضيعة: كبة بلبن، قمحية، فريكة، كوسا بلبن، كبة قراص، محشي ملفوف وورق عريش على لحمة.

4. عريشة جدو وشجر الزيتون والجوز واللوز والجنينة جنب البيت.

5. أحلى شي جرن الكبة، الكركة والدست.

6. بس تفيقوا من النوم وتلاقي الجيران عند إمك عم يعملوا صبحية ويشربوا قهوة ويحكوا على العالم وأخبار الضيعة.

7. بس تاكلوا مجدرة كل نهار جمعة.

8. أطيب ترويقة الصبح منقوشة زعتر على التنور مع خضرة ومنظر الوادي.

9. أطيب فنجان قهوة على الحطب وعرانيس درة مشوية.

10. ترويقة البيت كل يوم: بيض مقلي وخضرة وجبنة وماقيش من فرن الحارة.

11. تلتقوا بنسوان الضيعة ويسألوكون أيمتى رح يفرحوا فيكن وتتجوزوا من الضيعة.

12. المشي بالطبيعة وبين البساتين والشوارع الضيقة وبيوت القرميد وتشموا ريحة الأرض.

13. بس تكونوا عم تمشوا وتسمعوا جرس الكنيسة وتوقفوا لتشربوا مي مسقعة من العين.

14. وقت يموت حدا الكل بيلبس أسود ويعزي وما يتركوا أهل الميت لحالن لو شو ما صار.

15. وقت يكون في عرس بالضيعة والكل يفرح وينزلوا على الطريق يشوفوا العروس شو لابسي ويرشوا رز عليها.

16. أحلى شي بالدني أعياد الضيعة بالصيفية: المهرجنات، العشى القروي، عيد السيدة أو عيد شفيع الضيعة، ومهرجنات القطف.

17. بس يجي شهر أيلول وتبلش ستك تحضر مونة الشتوية: مربيات، دبس، مي زهر ومي ورد، زعتر بلدي، لبنة مكعزلة، كشك ولبن مروب.

18. أحلى شي بس تكونوا بالضيعة بموسم المونة أو القطف وتساعدوا ستكن وجدكن.

19. كل أحد بتفلوا مع زوادة أكل حرزانة وممنوع ضيعوا التبروار.

20. كل نهار جمعة بعض الضهر بتكونوا مش مصدقين تطلعوا على الضيعة تشوفوا أهلكن والتيتا والجدو.

21. أحلى شعور بس تفوتوا على دكان الحي القديم وتستحلوا قصص ما بتلاقوها غير بالضيعة. بتحسوا بس تجيبوا غراض من الضيعة إلا طعمة غير.

22. بس تقعدوا على السطيحة وتتفرجوا على لي رايح ولي جايي.

23. بس تناموا من قلبكن وتفتحوا الشباك وتتفرجوا على الوادي: أحلى نومة بالدني.

24. بس يجوا لعندكن ناس من بيروت وتنعجقوا فين ويصير بدكن تبرموهن بالضيعة.

25. تروحوا على الصيد وتاكلوا عصافير مع حامض ودبس الرمان.

26. هيك كانت إيامنا احلى الإيام جمعة الأهل والتيتا والجدو والحياة البسيطة الحلوة الخالية من الهموم يلي عم نعيشها حالياً.

27. أحلى شي وقت يجي نهار الأحد وتعملوا مشاوي وتاكلوا أطيب أكل مع تبولة وكبة قراص.

28. التمشاية بساحة الضيعة وكل الشباب والصبايا مجتمعين.

29. أطيب شي فنجان اليانسون على الفرندا وتحت العريشة.

30. كلنا بالضيعة عنا محل منحبو كتير ما حدا بيعرفوا ومنحب نروح علي بس نزعل أو نكون مهمومين.

31. قداس الأحد بالضيعة إلو غير طعمة.

32. بتحلم تتجوز حدا من الضيعة وتعمر بيت لإلك.

33. العرق البلدي ونبيد الضيعة أطيب شي عندك.

34. تحس بالحنية بس تشوف الكبار بالعمرعم يهتموا فيك ويخبروك عن الحياة والذكريات ويزعلوا بس طول الغيبة.

35. الروحة على المطعم بالضيعة إلها نكهة خاصة.

36. بس يصيروا أهلك يقنعوك تلفي على الضيعة لتتعرف وتتجوز.

37. بس يصير وقت تنزل على بيروت وتحس ما بدك تفل لأن لو شو ما صار ولو برمت العالم كلو رح يبقى قلبك معلق بهل محل.

وإنتو شو بتحبو بضيعتكن؟