٧٠ محل مميز لازم تزوروه بلبنان!

بعيد عن كل الضجيج اليومي وعجقة السير والتفاصيل الصغيرة اليومية لازم نذكر الجوانب الحلوة الموجودة بهالبلد الصغير لبنان بلدنا يلي فينا نبرموا من شماله لجنوبه بأسبوع، هالبلد يلي فينا نقضي في أحلى اللحظات ونعمل أجمل الذكريات، اخترنالكن أجمل المناطق اللبنانية والمطاعم وبيوت الضيافة والمراكز الأثرية من أقصى الشمال لأقصى الجنوب يلي فينا نقضي فيها أجمل الأوقات.

1. شباك حبيب، دير القمر

كلنا منحب نهرب من عجقة الشغل والمدينة بنهاية الاسبوع! كرمال هيك كنا كتير مبسوطين لما اكتشفنا محل مش كتير بعيد عن المدينة، بس أكيد بنسيك عجقتها! شباك حبيب بيت ضيافة كتير حلو موجود بمنطقة دير القمر بالشوف، وبيتميز عن غيره لأنو المبنى بني عام ١٨٣٧. هيدا يعني بيتخطى عمره ال١٨٠ سنة!

تواصلو مع شباك حبيب عبر الإنستغرام!

2. قهوة السوق، بعقلين

جوهرة بمنطقة بعقلين بالشوف، رح تستقبلكن ريحة القهوة يلي بتشق القلب. بيتميز المقهى بقعدة الأحلام وأكله الطيب وحلويات الغرام ومتة سخنة ورح تلاقوا أكلات بتذكركن بطفولتكن.

الرقم: 196 031 81

3. دوبل تي، الشبانية

ويلي عبالوا يغير جو، ما إلو غير يتوجه صوب “دوبل تي” الموجود بنص الطبيعة بغابة الشبانية، بقدم أكل طيب مع موسيقى حلوة وقعدة غير شكل بتنسيك هموم الدني.

الرقم: 919 021 71

4. بيت السنونو، كفردبيان

بيت السنونو هو بيت ضيافة بمنطقة كفردبيان حد فاريا. عنده غرف حلوة ونظيفة، كتير رح تعجبكن. بهالمحل المميز، فيكن تقضوا النهار قاعدين بالجنينة عم تلعبوا راكيت أو بس عم تستمتعوا بالسكوت.

الرقم: 866 400 71

5. ليف، البترون

قهوة بسوق البترون العتيق، بس تتعرفوا عليا رح تصير بيت أسراركن المفضل. عندن كل أنواع القهوة طيبة وشهية. السباشيل ليف قصة عندن بتجمع كل طعمات القهوة بفنجان واحد، شي متل الخيال.

الرقم: 220 229 71

6. بيت مرستي، الشوف

مرستي بيت ضيافي لبناني مستوحى من التراث الجبلي الأصيل، البيت بنص الجبل وبطل على أراضي الشوف يلي بتاخد العقل: قعدة السطيحة مع البرودات والمرجوحة غير شكل!فيكن تجوا عيلة أو أصحاب وتقضوا أحلى ويك أند بمحل مميز وأسعاروا مقبولة كتير مقارنة مع الغلا لي عم نشوفوا. هيدا المحل بيتميز بجمال قعدتو وبدكورو اللبناني الجبلي: بيت حجر، أكل طيب ومنظر روعة! يلي مش رايح على الشوف بحياته، رح يكتشف جمال المنطقة.

الرقم : 053 331 05

7. فروزن تشيري، الزعرور

استمتعوا بالمغيب وبقعدة تحت النجوم “بفروزن تشيري”، الزعرور.

الرقم: 225 661 71

8. سكر بنات، عمشيت

القعدة عندو كتير مريحة وبتفتح النفس على الأكل. نصيحة تعوا على معدة فاضية وجربوا البانكيك شوكولا مع فنجان قهوة.

الرقم: 679 624 09

9. بيت القناطر، بشري

عبالكن تقضوا رحلة من العمر؟ منعرفكن على بيت القناطر، بيت ضيافة ساحر ب بشري ب شمال لبنان. بيت بيشبه بيت الضيعة، غرفه دافية وواسعة بتطل عالوادي! الرقم: 76/657560

10. مطعم توريست، الباروك

عبالكن تكزدروا؟ ما إلكن إلا مطعم توريست، قعدة حلوة وبسيطة جنب الطبيعة ورواق لأبعد الحدود: الأكل عندن كتير طيب!

الرقم: 387 774 70

11. بيت الجبل، دير القمر

هل مكان مميز كتير بطل على مشهد بانورامي رائع. إذا كانت إمك من محبي الطبيعة والجبل، ما في أحلى من هيك مشوار تاكلو في أطيب لقمة بلدية.

الرقم: 767 160 72

12. كافيين، سن الفيل

إذا عم تتوحم على فنجان قهوة وصحن صلطة، هل محل رح يخليك تدلل نفسك. أكيد لازم تدوقوا الحلويات والوجبة اليومية لتكون تجربتكن مثالية.

الرقم: 925 777 70

13. فندق بالميرا، بعلبك

من وقت تأسيسه بسنة 1874, ما سكر فندق بالميرا أبوابه ولا نهار – حتى خلال الحرب الأهلية! مرق عليه زوار كبار متل القيصر فيلهلم الثاني سنة 1898, شارل ديغول، شاه إيران، فيروز، صباح، نينا سيمون، وغيرن كتير. الفندق حافظ على شكله التراثي والمالكين جربوا ما يغيروا شي حتى يضل قطعة من التاريخ.

الرقم: 127 371 03

14.مطعم لقيس، شتورا

أطيب صفيحة بالبلد. كل لقمة معمولة طازا وبتدوب بالتم!

الرقم: 490 931 09

15. كبة زمان، الأشرفية

مطعم متخصص بالكبة الزغرتاوية الأصيلة والطبخ اللبناني التقليدي. فيكن تطلبوا الصحن اليومي المميز وجميع أنواع المأكولات التقليدية والتراثية الجبلية متل الفوارغ، اللسانات، الضفاضع، والكبة اللبنانية الشهيرة بجميع أشكالها وطعماتها يلي نشأت بقرية زغرتا الساحرة بشمال لبنان.

الرقم: 934 429 01

16. فرن وفخارة، بقعكفرا

رح تلاقوا اهل الضيعة بهل فرن على إجرين عم يعجنوا ويخبزوا ويعملوا أطيب مناقيش معقول تاكلوها.

الرقم: 537 395 76

17. Explore adventure club – طريق صور الناقورة

بهالمنتزه رح يتسللو ولادكم كتير. في نشاطات كتيرة وحديقة حيوانات كبيرة وبحيرة كمان!

الرقم: 905 990 81

18. دومين دو تعناييل، البقاع

لكل محبي الرواق هل محل بسيط وغني بنفس الوقت، بيدعيك للراحة من جهة، ولاستكشاف السهل من جهة تانية: فيك تعمل بيسيكليت، تتمشى وتتسمع على الطبيعة، وتسترخي بأحضان الطبيعة وتتفرج على المي والبط.

19. قلعة السنجيل، طرابلس

قلعة السنجيل بطرابلس بتجسد تلات حضارات: العثمانية، المملوكية والصليبية. هل مكان مميز بهندسته التاريخية وبحجارته التراثية.

20. بحيرة بنشعي، زغرتا

كلنا عنا ذكريات حلوى كتير ببحيرة بنشعي بزغرتا لي بتتميز بسحرها ونشاطاتها الحلوة. فيكن تستمتعوا بالمنظر الرائع بالمطاعم جنب البحيرة يلي بقدموا أشهى الأطباق اللبنانية وفيكن تجدفوا أو تعملوا برمة حوالى البحيرة وتتصوروا كمان.

21. تشرين، إهدن

توجهوا صوب الشمال وزوروا ضيعة إهدن الحلوي لي ما في إلها مثيل. محل زغير خشب بقدم أشهى الأطباق، تشرين هو المحل المثالي لكل مين بحب الترويقة اللبنانية البلدية على أصولها مع أطيب فنجان شاي.

الرقم: 636 433 81

22. قهوة أنطون، عمشيت

مع قهوة طيبة وترويقة غير شكل، هل المقهى هو المكان المثالي لشوية هدوء و راحة. على المدخل رح تلاقوا جلسة الديوان وقعدة شرقية، تأملوا فيهن وقعدوا مع حبيبكن وشربوا أطيب فنجان قهوة على الصبح وسولفوا.

الرقم: 898 829 71

23. متحف جبران، بشري

متحف جبران خليل جبران من أبرز المعالم السياحية الموجودة ببشري. بالماضي كان هل متحف دير مار سركيس قبل ما يتحول لمتحف بضم 16 غرفة بتحوي غراض جبران الشخصية، كتبه، رسوماته، ومكتبته الخاصة.

24. بار دو بور، أنطلياس

القعدة رومانسية وخاصةً عشية: نصيحة، تعوا بوقت المغيب وخدوا أجمل الصور مع أغلى الحبايب.

الرقم: 006 444 71

25. كوبا كافي، القبيات

هل محل بيتميز بكرموا وقعدته الحلوة وبقهوته الشهية والغنية وصاحب القهوة كتير مهضوم. فنجان قهوة معرم مع قطعة كيك بالشوكولا، عم تتخايلوا الطعمة؟

الرقم: 840 351 06

26. كفرحلدا، البترون

هالضيعة موجودة بقضاء البترون ومعروفة بشلالها الرائع وبتنوع المطاعم الموجودة فيها على طول امتداد نهر كفرحلدا، لازم تزوروها بالأخص بالربيع لأن ذوبان التلج بزيد من تدفق الشلال وقوته.

27. سارة وكريم، طرابلس

فتشوا على القهوة الملونة والمزينة بالزهر بطرابلس، هونيك رح تستقبلكن ريحة القهوة يلي بتشق القلب. بيتميز المقهى بقعدته الحلوة وكيكات الشكولا الطيبة.

الرقم: 705 219 06

28. رامن يا، الجميزة

هل مطعم رح ياخدك على آسيا بكل شي بقدمو. متخصص بالنودلز وعندو كتير طعمات محضرة على الطريقة التقليدية. نصيحة تعوا على معدة فاضية لتجربوا أكتر من طبق.

الرقم: 446 416 71

29. كافي عيروت، إهدن

كمشوا حبيبكن وحبيبتكن أو صديقن المفضل وتوجهوا على كافي عيروت وكلوا أطيب فنجان سحلب مع كعك وكورنفلاكس مع أطيب فنجان شاي أو كافي.

الرقم: 884 383 03

30. مايريغ، الجميزة

مطعم أرمني بقدم لقمة بيت ولا أطيب بطريقة إحترافية مع أجواء رومانسية ساحرة.

الرقم: 227 228 03

31. ماريو إي ماريو Mario e Mario، مار مخايل

مطعم إيطالي ساحر بقدم أطيب بيتزا وباستا مع أجواء رومانسية وألوان بترد الروح.

الرقم: 036 888 76

32. بافاغلينو Bavaglino، الجميزة

مطعم إيطالي ساحر مع أكل تقليدي وأجواء رومانسية على درج مار نقولا.

الرقم: 081 091 81

33. كافي أولد تاون، برج حمود

Coffee Old Town محل فتح جديد ببرج حمود، بيتميز بديكور مميز وقعدة مهضومة. بقدموا كل أنواع القهوة الساخنة من الإسبريسو والباردة والمقطرة بالإضافة لبعض أنواع الكيك والحلو.

الرقم: 003 009 76

34. Urbanista، الجميزة وشارع بلس

أجواء دافية وحلوة عند هيدا المحل. إذا حابين تقعدوا مع أصحابكن أو حتى ليلي عنده شغل أو درس، هيدا المحل رح يعجبكن.

الرقم: 811 567 01

35. بيتزيريا دا ماركو، مار مخايل النهر

إذا بتحب البيتزا وشوارع مار مخايل الضيقة، هل محل رح يبسطك كتير. البيتزا معمولة على الطريقة الإيطالية، العجينة بتقرمش وطرية والجبنة بدوب بالتم. فيكن بس تخلصو أكل تكفو تتمشوا بالمنطقة.

الرقم: 027 171 03

36. ذا باينز، بشمزين الكورة

عبالكن تخيموا بنص الطبيعة؟ ما إلكن غير هل محل بالشمال، فيكن تولعوا نار وتشووا بطاطا وتستفيدوا من الطبيعة قبل ما يسقع الطقس.

الرقم: 142 565 03

37. مطعم الجرد العالي، الضنية

تتقضوا نهار كامل بالطبيعة ما إلكن إلا جرد مربين و خصوصاً مطعم الجرد العالي بين أشجار اللزاب ومع نسيم الوادي وصوت العصافير: ما بدها إلا ركوة قهوة أو كباية شاي أو حتى غدا بلدي. وإذا حبيتوا المحل بتقدروا تخيموا وفيكن تجيبوا معكن كل غراضكن.

الرقم: 537 881 81

38. بيت ساقي، ساقي رشميا

بيت ضيافة ساقي بيربط التاريخ والحب والذوق الحلو بمحل واحد، وهيدا الشي واضح بكل شي من الديكور للمعاملة الحلوة يلي بيتمتعوا فيها الضيوف.هيدا البيت بيستقبل أربع ضيوف مقسمين على غرفتين نوم. والصبح رح تستمتعوا بأطيب ترويقة لبنانية!

الرقم: 849 270 03

39. غابة العزر، القموعة

ما في أحلى من التمشاية بغابة العزر وقت الخريف مطرح ما فيكن تتفرجوا على وراق الشجر الدهبية لي بتلمع: رح تاخدوا أجمل الصور وتعملوا أحلى الذكريات!

40. شلالات سر جبال، الشوف

فيكن تتفرجوا على الشلالات وتسمعوا صوت المي وتزوروا المطاعم المجاورة: ما تنسوا تاخدوا معكن كاميرا!

41. صيداوي، طرابلس

إذا عبالك طاولة معرمة من السمك والمأكولات البحرية ما إلكن غير تعملوا كزدورة صوب طرابلس تشوفوا المدينة وتتمشوا وترجعوا تعبوا بطنكن بهل محل.

الرقم: 690 200 06

42. كزدروا، جبيل

عبالك تطلع بباص نقال غير شكل مع الناس لي بتحبن من جبيل على طريق عنايا مع أكل بشهي؟ كزدرو باص نقال بمنطقة جبيل بيعملكن أشهى الأطباق مع أجمل قعدة.

الرقم: 165 583 76

43. سمارولا، الأرز

المنظر بهالمحل بياخد العقل، فيكن تشربوا العصير الفريش، تاكلوا كريب أو تطلبوا حلو وتقعدوا على المرجوحة وتتفرجوا على الوادي وتنسوا الدني.

الرقم: 933 923 81

44. فيوري، الحمرا

فيوري بقدم بيتزا عالحطب بتاخد العقل، موجود بشارع فود ديستريكت بالحمرا. هل مطعم الرائع هو حلم إيطالي. فيكن تستمتعوا في بالأجواء الدافية مع الباستا الشهية وتقضوا قعدة إيطالية مية بالمية.العجينة سخنة ومقرمشة ملياني وطيبة، وصوص البندورة بيجي فوقا أكتر من نوع جبنة، رح تشهّيك كتير. مننصحك تجرّب الفيردي روسو والبيستو.

45. محل جابر جابر، زحلة

مش معقول تطلع على زحلة وما دوق أطيب منتجات صنع جابر. الورق عنب عند جابر قصة، بيجي محشي لبنة وبقلبو زيت زيتون بدوب بالتم متل العسل، خلطة ما بتلاقوها غير بزحلة وفيكن تاخدو قد ما بدكن على بيروت. وأكيد لازم دوقوا قالب الجبنة كابريتشيو المعتق: شي متل الخيال.

الرقم: 836 544 08

46. فرن دلال، شبطين

فرن دلال فرن عائلي صغير بضيعة شبطين بالبترون بيعملوا أطيب مناقيش ومورقة.العجينة مرتاحة مظبوط، كريمة كتير وكل شي بلدي: لقمة فيها نفس الضيعة.القعدة مهضومة بالفرن وبس يصير الطقس حلو فيكن تستمتعوا بالقعدة برا والمرجوحة. بس تخلصوا أكل فيكن تروحوا تتمشوا بضيعة شبطين، تكتشفوا المنطقة الحلوي وتشموا هوا نضيف.

الرقم: 778 882 78

47. مطعم كتف الوادي – طريق جرجوع

هالمطرح موجود بين جبلين عطريق جرجوع-اللويزة. هون القعدة ولا أروع والفيو غير شكل.

الرقم: 629 075 03

48. قصر موسى، دير القمر

زوروا قصر موسى وتعرفوا أكتر على تاريخ لبنان. صاحب القصر، موسى عبد الكريم المعماري كان حلمو يعمر هل قصر وبس كان صغير خبر المعلمة عنو وبس كبر فعلاً قدر يحقق حلمو ويعمر قصر تحول لرمز من رموز الشوف.

الرقم: 106 500 05

49. ريفر زن، الشوف

قعدة غير شكل على جنب النهر الصافي. في أحلى من هيك جو؟

الرقم: 887 223 70

50. قلعة سمار جبيل، البترون

عيشوا مغامرة تاريخية بهل قلعة المبنية على إيد الفينيقيي ولي تحولت بفترة من الزمن لملجأ لجدودنا بوج الإضطهاد. المنظر على القمة مخيف والحجارة لحالها بتحكي القصة.

51. Farmville، الباروك

مين بدوا يعيش حياة عكس حياة المدينة كلياً؟ Farmville موجود بقلب الباروك، وهو بيت ضيافة مع أراضي زراعية بطل على جبال الباروك الروعة.

الرقم: 811 711 76

52. غابة بكاسين، جزين

غابة صنوبر حلوي كتير فيا كتير ميزات تقليدية متل الأفران الأثرية ومعاصر الزيتون والجسور القديمة والعيون والطواحين الأثرية. وبتتميز الغابة كمان إطلالات بانورامية رائعة على سلسلة جبال لبنان.

53. مغارة فخر الدين، جزين

مغارة فخر الدين معروفة بشكل خاص وقريبة من الشلالات وإلا قصة كتير مهضومة، سمعوا.. هيي عبارة عن كهف تخبى في الأمير فخر الدين قبل ما يأسرو العثمانيي ويقتلو. كانت هل مغارة مخبى لشعوب المنطقة بوقت الحربين العالميتين الأولى والتانية.

54. بيت مغراق، عبدللي البترون

ضيعة مغراق إسم على مسمى، البيوت والطبيعة غرقانة بالمي، بس هيدا البيت واقف وناطركن لتزوروه. هيك قعدة بدها مشاوي من دون شك، طلعوا معكن اللحمة والكفتة والطاووق وهني بيعطوكن المنقل. ألف صحة!

55. عكرة، طرابلس

عكرة من أجمل المطاعم الأثرية بسبب موقعه بقلب السوق القديم. معروفين بأصناف الفول والحمص، ومين ما تسأل من أهالي المنطقة رح يقلولك ما الك غير عكرة! ما في أحلى من ترويقة الفول والحمص عل صبح، وصدقوا إنو في ناس بتجي من كل المناطق اللبنانية لتستمتع بهيك ترويقة.

الرقم: 500 438 06

56. الخان المقصود، تعنايل

مطعم وبيت ضيافي لبناني تراثي بتعنايل بيتميز بقعدة بسيطة بالطبيعة. المطعم بقدم أطيب لقمة لبنانية من منتجات البقاع وبتشرب أطيب كاسة عرق من الكركة البلدية، شي بشهي. هل بيت عبارة عن جنة صغيرة بيتألف من 7 غرف، وأكيد ما في أجمل من الكزدورة بالجنينة واكتشاف المزرعة لي بتصنع أجود المنتجات البلدية الطازة.

الرقم: 279 124 03

57. أبيتيتو تراتوريا، كافة الفروعة

رح تلاقي أشهى المأكولات الإيطالية التقليدية يلي بتتقدم بجو دافي ومريح وقعدة بتخلي قلبك يدق. الحيطان الحجر، الكراسي الخشب وأواني الزهور الحلوة أكيد رح يعجبوكن بهالمطعم الإيطالي، بتحس حالك بشي جبل بإيطاليا.

أبيتيتو عندو أكتر من فرع: جميزة، حازمية، حمرا، برمانا، بترون.

الرقم: 600 682 03

58. بيت نهى، أنفه

بيت نهى بيت قديم مصنوع من الحجر التقليدي، مع ديكور ولا أحلى، ألوان بتشق الروح وسحر الورود.هالبيت كمان بقدم لكل الزوار ترويقة لبنانية بالسلة من أطيب مناقيش والخضرة وبيض وغيرهن كتير، وأكيد فنجان قهوة غير شكل.

الرقم: 514 480 81

59. بيت هيفا، الكورة

بيت ضيافي لبناني مستوحى من التراث الجبلي الأصيل، البيت بمنطقة القلحات الكورة بشمال لبنان وبطل على مناظر بتاخد العقل: قعدة سطيحة مع برودات، تبولة وكاس عرق. بهيدا المحل فيكن تستمتعوا بتجربة بعيدة عن حياة المدينة بين جبال الخضرة والهوا النضيف.المحل كتير حلو: بيت حجر، شجر زيتون، أكل لذيذ، مونة بيت، هوا شمالي وشوية حب!”بيت هيفا” بصنعو مونة كمان، كل شي بيخطر على بالكن موجود: دبس الرمان، مربى البندورة، مي ورد، مي زهر، زيت زيتون، زعتر بلدي، مربى بلدي وغير منتجات وأكيد كل شي مصنوع بحب!

الرقم: 152 513 03

60. أبواب، وادي كفرا

عند أبواب القعدة رايقة وحلوة كتير، الهوا جنوبي، صوت المي بغني بدنيكن وريحة الطبيعة الطيبة بتغمر الأرض. هل محل أكيد رح يذكركن بجدودكن وينسيكن همومكن: هون الموسيقى جبلية أصيلة والقعدة لبنانية مية بالمية.”أبواب” بيتميز عن غيرو بأكلو اللبناني الشهي. عبالكن مشاوي؟ في. عبالكن ميزا على أنواعها؟ كمان في. ولكل محبي الطبخ اللبناني، هل محل متخصص بتقديم أشهى الأطباق البيتوتية وبطريقة كتير مهضومة ومرتبة: مجدرة، بطاطا مقلية، خبز من فرن الضيعة، مي باردة من النبع، خضرة من الحقلة، طنجرة بقلي، كبيس بلدي، ليموناضة بخلطة سرية وغيرها من المأكولات اللبنانية لي بتاكلو أصابيعكن وراها: حتى الصحون عندن غير شكل!
الرقم: : 070 811 81.

61. فيلا شمعون، حصرون

بتطل فيلا شمعون على وادي قاديشا المقدس بضيعة حصرون، وتم ترميم هل بيت بعد ما تسكر لمدة 47 سنة بسبب الحرب اللبنانية. استرجعت الفيلا رونقها ومجدها السابق وتحولت لبيت ضيافة فاخر بيتميز بديكور من الستينيات مع تسع غرف وتراس موزعين على 4 طوابق، وفي كتير جنينات وبيسين.

الرقم: 205 508 70

62. سيدة الحصن، إهدن

سيدة الحصن بإهدن من أجمل كنايس الشمال، ببتميز بطلتها الحلوة وخاصة وقت الغروب. المحل مثالي لشم الهوى وحتى لتقضوا بعض الضهر مع أصحابكن.

63. بيت أطلس، ساقي رشميا

هيدا بيت الضيافة رح ياخدكن عالمغرب بديكوره واجوائه المميزين. اتجهوا إلى منطقة ساقي رشمايا، يعني 30 دقيقة من بيبلوس وبتوصلوا على Atlas Guesthouse. على إرتفاع 1200م بتنبسطوا بطقس صيفي حلو، وبالليل بتبوردوا. تواصلوا معهن عبر الإنستغرام.

64. مطعم الشالوف، جزين

بتاكل عندن أطيب أكل لبناني مع قعدة على رمرمية بطل على الوادي وهوا جنوبي ونسمة خريف.

65. قصر الأحلام، بخعون

هل قصر ما رح تلاقوا متلو غير بالضنية وتعمر على إيد محمد بخعون لي كان عندو حلم يعمر شي غريب وفيو عظمة وهيك تعمر هل قصر ب25 سنة بس ومن أحجار من مختلف مناطق العالم.

الرقم: 278 511 03

66. شلالات عيون السمك، الضنية

المنظر بهل محل ساحر والتلج بس يدوب بيتحول لمي الشلال والتنوع الحرجي بهل محل واضح. بتشتهر هل منطقة بالأنهر وينابيع المي العذبة والبحيرة الكبيرة.

67. قمة جبل الأربعين، جزين

إنتو عارفين إنو أعلى مرجوحة بالشرق الأوسط هيي بالضنية؟ ضروري تزوروا قمة جبل الأربعين لأن هيدي المنطقة فيها تجربة كتير مميزة ولا ممكن تلاقو متلا! الشي المميز بهل محل المناظر الخلابة، وأكيد المرجوحة العالية! فيكن تتمشوا على المسار الحديد وتشوفو أجمل غروب شمس فوق الغيوم! وكمان ما تنسو تزوروا التمثال على شكل الإيد.

68. لا ميزون دو لا فوري، جزين

هل بيت الخشبي موجود بأجمل غابات لبنان، بكاسين. إذا كنتوا عم تنبشوا عن محل رايق لتقضوا في وقت حلو مع العيلة وتستمتعوا بالنشاطات.

الرقم: 222 800 07

69. بحيرة شوان، نهر ابراهيم

جنة الشوان هيك وصفوها من شدة جمالها وروعة مناظرها الطبيعية، بحيرة الشوان هي من أروع الأماكن السياحية يلي فيكن تمشوا وتسبحوا وتخيموا فيها.

70. محمية الشوف الطبيعية، الشوف

تمشوا بين أرزات الشوف وتنشقوا هوا نضيف. نصيحة جيبوا معكن قنينة مي وشوكولا لتتسلوا بالطريق.