١١ مسبح خاص بلبنان فيكن تروحوا علين هالصيفية

شي مرة حسيتوا إنو البيسين العام في كتير عالم ومش مرتاحين وعبالكن المطرح يكون فاضي لترتاحوا مع عيلتكن وولادكن؟ هل سنة كتار قرروا يفتحوا مشروع المسبح الخاص وخاصةً بمنطقة عاليه لكل حدا حابب يروح على البيسين ويروق راسه من دون عجقة أو ضجة. اليوم رح نخبركن عن ١١ بيسين خاص موجودين بلبنان، فيكن تحجزوهن بس لإلكن لفترة محددة إذا عبالكن تكونوا لحالكن.

١. إيسبيرانزا Esperanza Private Pool، كفرمتى

هالبيسين فتح جديد بمنطقة عاليه، بتلاقوا بهل محل إنو في برود والطقس حلو وبنفس الوقت الشمس واطية إذا حابين تتشمسوا يعني بتلقطوا لون على المظبوط. في كمان مرجوحة، وقعدة على البيسين وشالي إذا عبالكن تناموا وتسترخوا.

الرقم: 828 633 71

٢. لولو Lolo Private pool، كفرمتى

بيسين موجود بأحضان الطبيعة بين الشجر والوديان، بيكشف على أجمل المناظر الطبيعية. المي نضيفة ونقية، القعدة بالطبيعة بترد الروح وفي مقعد برا كتير مهضوم إذا عبالكن تاكلوا إنتو وعم تتفرجوا على الطبيعة وفيكن كمان تناموا وترتاحوا بقلب الشاليه أو تتمددوا على االكراسي المريحة وتتشمسوا إنتو وعم تتفرجوا على المناظر الحلوة.

الرقم: 728 946 71

٣. بانوراما، بطحا-كسروان

بتحسوا هل محل موجود بين الغيوم، ورح ياخدكن على عالم الخيال للحظات. البيسين بيكشف على الوديان على مد عينكن والنظر لتوصلوا على خليج جونية وترجعوا. بهل محل في شالي وقعدة لتاكلوا وتسترخوا وchaises longues لتتشمسوا وقعدة ملونة لتشوفوا المغيب وتحسوا حالكن بالسما.

الرقم: 111 501 71

٤. ذا غروف The Grove Private Pool House، كفرمتى

هل محل جنة من السما على الأرض، هوي عبارة عن قعدة بنص الطبيعة ومنظر بطير العقل. بتجوا بتاخدوا لون، بتسترخوا بالمي والهوا بيغمركن وهيك بتعيشوا أحلى شعور. هل محل مناسب لأصحاب، عيلة أو شخصين بحبوا بعض وعبالن يبقوا لحالن.

الرقم: 416 331 71

٥. أكوا ميال Aqua Miel، كفرمتى

بعدنا بكفرمتى، هل ضيعة الحلوة مخباية أجمل المسابح الخاصة بقلب الطبيعة متل هل محل، فيكن تعملوا مشاوي، تسترخوا بقلب الشالي، تتفرجوا على المنظر الحلو وتسبحوا من دون ما حدا يزعجكن.

الرقم: 358 433 71

٦. ماريز غاردن Mary’s Garden، بدادون-عاليه

مسبح خاص ساحر موجود بأحضان الطبيعة مع قعدة ومحل للشوي، مناسب لضهرة مع العيلة والولاد والأعياد الميلاد والعطل. ومش بس هيك، في بار خاص بالمسبح إذا عبالكن تشربوا شي إنتو وعم تغطسوا إجريكن بالمي وتسرحوا بأفكاركن.

الرقم: 931 991 70

٧. ذا ناتور The Nature Private Pool، كفرمتى

هل بيسين بساع مجموعة كبيرة من 15 ل20 شخص وفي كمان يستقبل مجموعة زغيرة، بتلاقوا في قعدة غير شكل، محل لتتشمسوا، مطبخ زغير، محل للشوي وحمامات وأكيد المنظر بياخد العقل.

الرقم: 730 305 81

٨. ذا فيو The View Private Pool، كفرمتى

بعدنا بعاليه وتحديداً بكفرمتى، شوفوا هل محل مرتب كتير رح يفاجأكن، في شالي حجر وقعدة خشب مع منظر بطير العقل والمي بتعقد، حتى فيكن تقعدوا بقلب البيسين لأن في مقاعد. بتحسوا هل محل معمول لتسترخرا وترتاحوا وتعيشوا حياة الرفاهية للحظات.

الرقم: 812 158 71

٩. كاكتوس، الدبية-الشوف

الشوف هي المنطقة الساحرة ببلادنا ولنستفيد منا رح نطلعكن على هل مسبح الرائع بأحضان الطبيعة، بتلاقوا كمان شالي كتير مرتب وقعدة بترد الروح. أحلى شي بهل مشوار إنكن رح تحطوا حالكن بالمي، تبوردوا وتسترخوا إنتو وعم تتفرجرا على أحلى المناظر.

الرقم: 112 481 03

١٠. مسبح سليمان، شموت-جرود جبيل

هلق رح نطلع صوب جرود جبيل يلي بتحمل جمال مش الكل بيعرفوا، ضيعة شموت بقولوا عنا خضرا لأن مليانة طبيعة وشجر. هل محل مش بس كتير حلو والجو في رومانسي كمان، رح تلاقوا مرجوحة فوق المي وهيك بتتحنزقوا وبتتفرجوا على أجمل المناظر. ما في أجمل من المنظر هون وقت غياب الشمس والقعدة على الgazon.

الرقم: 266 133 79

١١. أوتلاند Outland، برمانا

برمانا من أجمل مناطق لبنان، الكل بيقصدها ليشوف السوق والبيوت العتيقة ويعيش أجواء الصيفية وهيدا المسبح موجود بقلب الطبيعة وبيكشف على منظر بانورامي ساحر. بتلاقوا في مطعم خاص وكابان ومحل لتتشمسوا ومرجوحة وهيك فيكن تقضوا وقت بطير العقل مع أغلى الناس على قلبكن.

الرقم: 391 272 03