شوفوا معنا أحلى وأنضف شواطئ وبحور مجانية بلبنان

صرنا اليوم نعتل هم الروحة على البحر خاصةً إذا كنا عيلة كبيرة ومعنا ولاد يعني مشوار واحد على البحر صار يكلف قد معاش شهر بكاملو وهاي إذا ما حسبنا الأكل والشرب على البيسين لأن ممنوع نجيب أكلاتنا معنا وإذا ما حسبنا كمان كلفة البنزين، لهيك حبينا نوفر عليكن شوي وعملنا جولة على أنضف وأرتب وأجمل الشطوت المجانية الموجودة بلبنان ورح نخبركن عن كل محل. وأكيد مننصحكن بزيارة شواطئ صور وجبيل والبترون وعمشيت يلي هني من أجمل البحور يلي ممكن تزوروها وتقضوا نهار بطير العقل مع العيلة من دون ما تدفعوا ولا نغلة.

خلينا نبلش جولتنا سوا، جاهزين؟

١. شط جبيل الشعبي، جبيل

مدينة الحرف ولا مرة بخلت علينا بتقديم أجمل المرافق السياحية بالبلد ومن ضمنها شطها الشعبي المميز. البلدية منظمة مجموعة بتتألف من ٣ شطوت مجانية مفتوحة للناس من ضمنها شط البحصة، شط الرمل وشط الشامية. بحر جبيل مناسب للعيل والمجموعات الكبيرة والأصحاب، قريب من المطاعم والمحلات، فيكن تستأجروا كراسي وطاولات وتجيبوا معكن أكلكن بس ممنوع تجيبوا مناقل وأراكيل حفاظاً على السلامة العامة.

٢. بحيرة الأرانب، طرابلس

مين بعد مش رايح على هل جزيرة المميزة؟ الدخولية على جزيرة الأرانب مجانية، بس رح تتكلفوا شي بسيط يعني مشوار الطريق من المينا على البحيرة بالشخطورة بالمي وبدها 20 دقيقة لتوصلولها وهيك بتعيشوا مغامرة كمان. بتتميز هل جزيرة برملها الأبيض وميتها الزرقا النقية، رح تحسوا حالكن للحظة سافرتوا من لبنان.

٣. شط صور الشعبي، صور

هلق رح نروح على مدينة صور العريقة لنخربكن شوي عن شطها المجاني لي بيتألف من 50 خيمة وstands أكل وشرب ومساحة عامة وكبيرة للتشمس وتناول الطعام واللعب وحتى فيكن تجيبوا معكن أرغيلة وتستمتعوا بالجو الحلو. يعتبر شط صور من الأنضف بلبنان وهوي محمية بيئية طبيعية للسلاحف المائية يلي يمكن تصادفوها بس تكونوا عم تسبحوا: ولا أحلى من هيك مشوار!

٤. شط البترون العام، البترون

رح تلاقوا بالبترون عدة شواطئ عامة فيكن تفوتوا عليها من دون ما تدفعوا: شط البحصة، شط كفرعبيدا، شط كولونيل، شط داني Dany’s Beach Bar، وشط بيار أند فرندز Pierre and Friends وبتتنوع هل الشواطئ بين الرملية والصخرية بس لي بيجمعها إنها نضيفة وقريبة على المحلات والمطاعم. على فكرة فيكن تقضوا نهار على البحر بالبترون، تسبحوا وتاخدوا لون حلو لأن الشمس دهبية هون، ترجعوا تختموا نهاركن باكتشاف البترون، تتمشوا بالسوق العتيق وتشوفوا مغيب الشمس وتاكلوا بوظة وتستمتعوا بالمهرجانات الصيفية.

٥. شط أنفه، الكورة

بيقعد منتجع “تحت الريح” على شط أنفه وبيتميز بوجود شاليهات بيضا وزرقا ويطلق على هل مكان لقب “أنفوريني” بسبب تشبيه الزوار للشط بجزيرة سانتوريني اليونانية. بيتميز هل شط إنو مجاني وبتحيطوا مجموعة من المطاعم والكافيهات والمحلات وبالديكور لي رح يحسسكن إنكن سافرتوا على اليونان. كمان بس تخلصوا فيكن تعملوا جولة بأنفه وتشوفوا الملاحات البحرية وتزوروا السوق العتيق.

٦. شط عمشيت، عمشيت

عمشيت بتتميز بالمناخ الحلو لي بيجمع بين التراث والبيوت العتيقة والبحر وصيد السمك وهلق رح نروح على شط عمشيت يلي كتار صاروا عم يقصدوا بسبب النضافة والقعدة الحلوة والقريبة على المطاعم والأفران والدكاكين. فيكن تستمتعوا في بالأجواء المهضومة والصديقة للبيئة لأن الشط كتير نضيف والخدمة منظمة والمي ممتازة وفيكن كمان تستأجروا طاولات وكراسي وتاكلوا وتشربوا وتستمتعوا بوقتكن على الآخر.