دليلكن لأطيب باستا بالضيعة: ٦ مطاعم ساحرة لازم تجربوها

من بعد ما خبرناكن عن أطيب منقوشة بالضيعة، اليوم منخبركن عن الباستا.

إذا كنتو بتفكرو متلنا، أكيد ما عبالكن تروحوا على نفس المطاعم كل مرة بتجوا على الضيعة ويمكن بيجي عبالكن تاكلوا أكلات إيطالية وشوية باستا مع صوص دافية وكاسة نبيد بس بتحتاروا وين تلاقوا هيك قعدة بالضيعة. ما ألذها هل قعدة بالخريف مع الحبيب. لهيك رح نخبركن عن مجموعة محلات بيعملوا أطيب باستا على الأصول بضيع لبنان نحنا وعم نعرفكن عن مميزات كل محل وكل ضيعة.

١. . لو بيشي دي سيدر Le Pichet des Cèdres، الأرز

رح نبلش مشوارنا من فوق، من عند ضيعة بقولوها أرز الرب لأن هون السما قريبة، هل ضيعة فيها أوتيل بيشبه البيوت الزغيرة الموجودة بسويسرا، مخبى مطعم مميز موجود بقلب سيدروس أوتيل Cedrus Hotel، بقدم أشهى الأطباق اللبنانية والعالمية ولقمة إيطالية ولا أطيب مع قعدة كلاسيكية مريحة وبيتمتع بخدمة ممتازة. القعدة بهل أوتيل رح تخليكن تعيشوا تجربة استثنائية ولحظات ما بتنتسى بسبب الديكور الكلاسيكي الرائع والمنظر الخيالي من البلكون والدفا.

الرقم: 777 678 06

٢. جنينة رفانيا، نهر الدهب

يعتبر مطعم “جنينة رفانيا” بمنطقة نهر الذهب من أطيب وأفضل المطاعم البلدية بالبلد. فهوي عبارة عن مطبخ إيطالي تقليدي بقدم قائمة متنوعة من أشهى الأطباق المستوحاة من المطبخ الإيطالي واللبناني. بيحضر العديد من الصحون الإيطالية التقليدية البلدية المعمولة بلمسة لبنانية ونكهة شهية متل السباغيتي على أنواعها، والبيتزا المعمولة على الطريقة التقليدية وغيرها من الأطباق المصنعة من الباستا. الخبز البيتوتي بالجنينة لا يفوت! القعدة على العشا برا قدام بيت الحجر إلها نكهة خاصة وبتحكي عن جمال هل مكان وبتجلب السعادة والراحة.

الرقم: 277 142 03

٣. زهرتوني، القبيات

مين ما بيعرف ضيعة القبيات؟ هل ضيعة من أجمل الضيع بلبنان لي ما بيعرفها ما بيعرف إنو فيها مطعم إيطالي من أطيب المطاعم لي بتعمل باستا طليانية على الأصول. القصة وما فيها إنو الشيف طوني قرر يرجع على لبنان ويعمل أطيب معكرونة إيطالية بلبنان. طوني زهر إنسان بيعشق الحياة والأكل الإيطالي وضيعتو، كرمال هيك، بعد ما فتح لسنين بالأشرفية، قرر يجيب طعمات إيطاليا على قلب الضيعة وياخدنا جولة على شوارع روما لناكل المعكرونة على الأصول. الشي المميز بهل مطعم إنو بيعمل باستا organic من طحين الفرخة والبيض مع زيت الزيتون والمي، عكس الباستا الجاهزة لي بيعملوها بالمطاعم عادةً لي بتحسوا إنو طعمتها متل طعمة العجين لأن بس بيستعملوا الطحين. القعدة جوا وبرا حسب طلبكن وأكيد حسب الطقس ورح تشوفوا الشجر غامركن من كل الميلات.

الرقم: 844 469 81

٤. . تشيري لاين، حمانا

هل محل موجود على الشير حد قصر لا مرتين الأثري، بتقعدوا برا بتسمعوا صوت المي وبتاكلوا أطيب صحن باستا. القعدة بهل محل ساحرة فيكن تاكلوا كتير من أطباق الباستا الشهية إنتو وعم تسمعوا موسيقى إيطالية وفرنساوية رومانسية. بلشوا وجبتكن بالمقبلات متل الباستا المطبوخة بصلصة البيستو المقدمة مع التوم والنعنع. لوجبتكن الرئيسية ما فيكن ما تدوقوا أشهى معكرونة! إذا عبالكن كاربونارا كلاسيكية أو باستا مع أربع أنواع جبنة، أو شي جريء متل الباستا مع السالمون بالصلصة البيضا مع أعشاب، أكيد رح تستمتعوا بالأكل وبالقعدة.

الرقم: 588 335 71

٥. بياتزا Piazza1140، حمانا

بعدنا بضيعة حمانا، هل محل عبارة عن كوخ زغتور حجر دافي ومكنكن بقلب ساحة الميدان. القعدة بهل طقس بهيك محل بترد الروح، جربوا البيتزا الأسطورية لي بيعملوها وأطباق الباستا المطبوخة على الأصول. القعدة خشب مهضومة والجو رومانسي على ستيل الضيعة. تذوقوا طبقات من الباستا مع صوص البيستو وصوص الحمرا مع خلطة سحرية، أكيد على وجها حبق.

الرقم: 178 138 79

٦. ذا فيو The View، مزيارة

هلق منروح على ضيعة مزيارة لنكتشف هل قعدة المكنكنة ونشوف هل مطعم لي بقدم أطباق عالمية بتاخد العقل. هالمطعم الرائع هو حلم إيطالي. فيكن تستمتعوا بالاجواء الرومانسية مع الباستا الشهية وتقضوا ليلة جبلية حقيقية. كل لقمة باستا رح تبعتكن رحلة ممتعة على بورتوفينو مع حبيبكن لأن مزيارة بتشبه الجنة ببيوتها الغريبة ومناظرها الطبيعية الخلابة. بالصيفية لازم تاخدوا حبيبكن لسهرة ممتعة على التراس. بتتميز قائمة الباستا بأطباقها التقليدية متل السباغيتي كاربونارا، معكرونة ترافل، والمعكرونة على قريدس المحضرة على الطريقة الطليانية! وما تنسوا تجربوا الريزوتو يلي ما بيتفوت إنتوا وعم تخبروا حبيبكن كل شي بتحبوا في.

الرقم: 270 197 76