١٢ شغلة بس المدلّع بالبيت بيعملها

كلنا عنا هالخي أو الأخت بالعيلة اللي مدلعين على الآخر ومفكرين العالم بيبرم حوليهن، سواءاً كان الزغير أو الكبير أو الوحداني. لنضحك سوا شوي، جبنالكن كم شغلة بيعرفها بس المدلع بالبيت.

١- اكتر شي امكن بتعيطلن

بيضلوه اسمن على لسانها على الرايح والجاي وفوق هيك بتغلط بإسمكن.

٢- عطول بتاكلوا عيطة كرمالن

لأنو هني الملايكة وأهلكن دغري بصدقوهن شو ما حكوه.

٣- عطول بيقعدوا ميلة الشباك أو قدام بالسيارة

وانتوا بتحشروا حالكن ورا.

٤- اكتر واحد امكن بتجبلوا غراض

اكتر حدن بيطلعلوا تشيبس وشوكولا بين إخواتكن كلن. وبضلن يقولوا “بدي” و “بدي”.

٥- غلطتن بتقطع بكل رواق

ما في لا دراما ولا عييط، بس انتو بتغلطوا مرة وبينمسح فيكن الأرض.

٦- ما حدا بيسترجي يقلن “لا” على شي

بيعملوا اللي بدن ياه وبروحوا محل ما بدن، وحتى ما بياخدوا إذن. وإذا شي نهار سمعوا كلمة لا، بصير فيه إنهيار بالبيت. ما حدن بيسترجي يحكي معن او يتدخل فيهن.

٧- دايماً بينعمل أكلاتهن المفضلة

“حبيبتي عبالك لبن عصفور بنص الليل؟ ولك تكرم عيونك.” وإنت ما بتسترجي تطلب مجدرة.

٨- مستحيل يشيلوا قشة بالبيت

واذا اتحركوا بس شوي، بكون انجاز عظيم.

٩- اكتر شي مستلمين غيرن

بيتمسخروا على الكل بالبيت وبيستلموكن على الزغيرة والكبيرة، بفكروا عندن حس فكاهة خارق وبيزمطوا بكل شي بيحكوه.

١٠- مستحيل يعتذروا

لو على اكبر غلط بقولوا الحق عليكن، كيف ما كان، حتى الغلط بشوفوه صح.

١١- بقولوا الشغلة متل ما هي

ما فيه فيلتر ل حكين ابداً، وبكونوا عارفين انو شو ما طلع من تمن ما بصير شي. ما عندن شي يخسروه.

١٢- عارفين حالن مدلعين

ومبسوطين وشايفين حالن بهل الشغلة. وما بتسمعوا إلا “أصلن ماما وبابا بحبوني اكتر”، بس هيك بحبوا يذكروكن.

بدكن تضحكوا؟ مشوا نتذكر أجمل ٨ ذكريات مع التيتا والجدو