بحاجة لسفرة؟ ١٠ أماكن بلبنان رح يسفروكن من دون ما تسافروا

عبالكن سفرة بس مش قادرين تسافروا أو بعد ما طلعتوا باسبور؟ في كتير مطارح وأماكن طبيعية فينا نرحلها بلبنان لنتسلى بعطلة نهاية الأسبوع ونحس كأن سافرنا، بس كتار منا صرنا عم نحس عم نعيد حالنا بالضهرات. لهيك قررنا نعرفكن على أماكن طبيعية وأثرية مخباية بلبنان لتروحوا تكتشفوها المرة الجايي.

١. مغارة الزحلان، الضنية

بتتتمتع مغارة الزحلان بكتير من الهياكل والقاعات لي نحتتها الطبيعة وتحولت لسراديب أفقية وعمودية. بتتميز هل مغارة بالجمال من برا ومن جوا، فهيي موجودة بقلب جزيرة برية بتحيط فيها تلات وديان بيمرق من خلالها معظم أنهار الضنية وبتطلع منها تلات شلالات من اتجاهات مختلفة. هل مغارة يرجح إنو يكون عمرها آلاف السنين وبتتميز بتلات طوابق ومنها بيطلع نبع زحلان لي بيتحول لنهر. تأملوا الجسر المعلق بنص الطبيعة لي رح يحسسكن إنكن بأحد جبال الصين الشاهقة.

٢. وادي عودين، عندقت

من أجمل المناظر يلي ممكن تشوفوها بلبنان-وادي عودين كتير كبير، عبارة عن مساحات خضرا ما بتخلص ولا يمكن إنسان يوصل عليها كلها. بتجوا على ضيعة القبيات بتبرموا شوي وبترجعوا بتكفوا على عودين وبتاكلوا مناقيش على التنور مع كباية عصير مع هل منظر الخيالي.

٣. عيون أرغش، بعلبك

من بعد ما تقطعوا القرنة السودا بتوصلوا على عيون أرغش. هل منطقة بتمميز بالتلال الخضرا والبرك والبحيرات الطبيعية لي بتشكل لوحة فنية. غير هيك، بتلاقوا العديد من المطاعم والكافيهات داير من دار هل معلم الطبيعي.

٣. بالوع بلعا، تنورين

بس تروحوا على تنورين رح تلاقوا أعمق بالوع شايفينوا بلبنان، أسفل هل بالوع شلال طبيعي يعتبر من أجمل الشلالات بالعالم، بتجوا بتشوفوا الجسر الطبيعي وبتعيشوا الشعور إنكن تكونوا واقفين تحت بالوع عميق ما فيكن تشوفوا لوين بيوصل قد ما عميق.

٤. معمل الحرير، القبيات

ما فيكن تشبعوا من ضيعة القبيات، كرمال هيك لازم تزوروا معالمها التراثية وتحسوا بالعظمة، هل معمل أكتر من حلو رح يردكن للقرن الماضي بهندستو وحجارتو. هل مكان تم بناءو من قبل عيلة إيطالية كانت عايشة بالزمانات بالضيعة وصاروا جزء من الضيعة وتاجروا بالحرير وشغلوا كل أهالي القبيات وحتى الجوار. وهيك تم بناء هل تحفة الأثرية لي تحولت لمعرض وصالة عروضات مفتوحة للجميع.

٥. راس البياضة، الناقورة

من أجمل المحلات يلي فيكن تشوفوا فيها البحر بلبنان. هل محل مثالي للسباحة والغطس أو لمجرد الإستمتاع بغروب الشمس من ورا البحر.

٦. لا جيتي La Jetée، الأرز

يمكن الحكي ما بعبر عن جمال هل مكان، واقف على راس الزمن، وبس توصلوا على هل نقطة بتلاقوا كل وادي قنوبين تحتكن ومغارة قديشا بالكعب، بس تطلعوا ما رح تساع عيونكن المناظر الحلوة. هل محل كانوا الأتراك بالزمانات يكبوا في الناس المجرمين أو لي بعارضوهن وكانوا يموتوا وما حدا يعرف وين جثتن صارت.

٧. مغراق عبدلي، البترون

استمتعوا برحلة ساحرة على ضيعة مغراق الغرقانة بالمي والبيت الخشب لي مخبى فيها وعملوا أحلى بيكنيك. هيك قعدة بدها مشاوي من دون شك، طلعوا معكن اللحمة والكفتة والطاووق وهني بيعطوكن المنقل. رح توصلوا وتلاقوا المي محيطة بالبيت وتحسوا حالكن بفينيز للحظة: تجربة بتاخد العقل!

الرقم: 118 861 71

٨. بيوت مزيارة، مزيارة

مزيارة ضيعة حلوة كتير، بإيام الحرب هاجر الكتير من سكانها وبس رجعوا على لبنان عمروا أجمل البيوت ذات هندسات خارجة عن المألوف. برموا الضيعة وتفرجوا على بيوتها الغريبة العجيبة، لي على شكل طيارة وهرم ومعبد قديم وغيرها من البيوت الغريبة.

٩. الملاحات، أنفه

تعتبر الملاحات بأنفه منجم الدهب الأبيض أو “الملح” المصنع بطريقة طبيعية. بس تجوا على دير سيدة الناطور بتشوفوا هل ملاحات من بعيد متل كأن شي لوحة فنية مرسومة بريشة بيضا، بس تقربوا بتعيشوا تجربة لأول مرة بتعيشوها من خلال تأمل هل تحفة الأثرية.

١٠. بحيرات قرنايل، قرنايل

بس تطلعوا صوب فالوغا وتكفوا على قرنايل رح توصلوا على تحفة فنية: بحيرات اصطناعية من أجمل البحيرات الموجودين بلبنان. بتقعدوا من بعيد بتتأملوا غروب الشمس وفيكن تتمشوا وتكتشفوا هل محل المميز أوتخيموا وتعملوا بيكنيك.

شوفوا كمان، ١٨ دولة فينا نسافر عليها من لبنان بدون فيزا.