١٤ عبارة بتضحك بيستعملها اللبناني ليزحطلك

اللبنانيين معروفين بكرمن بالضيافة على الآخر، بس أوقات فيه مواقف مع أشخاص مزعجة لازم تنزعب، ومن هون اجت كلمة “زحّط”. شوفوا معنا ١٤ عبارة بتضحك بيستعملها اللبناني ليزحطّلك.

١- “مطوّل بعدك هون؟”

هيدا دليل انه الشخص داق خلقه منك وبدو ياك تفل هلق بهل اللحظة.

٢-“إي، إن شا الله شي نهار”

عبارة عطول معناها “لا”، يعني لما يستعملها اللبناني بتصير شبه مستحيلة الخبرية كلها.

٣-“دخيل ربّك زحط من هون”

يعني ممكن ع شوي وبصير مشكل بيلمّ العالم كلها عليكن.

٤-“الباب بفوّت جمل”

يعني رحت وجيت نفس الشي، زحط وما فيه حدا لاحقك.

٥- “انت شو جابك هلق؟”

بمعنى اللبناني ما كان متوقع تجي، ومجوتك أكيد مش مرحب فيها.

٦-“من وين طالعلي حبيبي؟”

هون اللبناني بكون طلع خلقه عليك وبطل طايق وجودك كله على بعضه.

٧-“اضهر وسكر الباب من برا”

عبارة مهضومة لتخلي كل حدن بيفوت على غرفتك بلا أذن انه يزحط لبرا.

٨-“خلّصنا شو في؟ /خير، شو فيه؟”

عبارة لتستعجل باللي عم تحكيه، لانه صبر اللبناني خلص ونشف على الآخر.

٩-“فلّ من خلقتي/وجي”

كمان عبارة كلاسيكية لتزحط لحدن مزعج على الأصول.

١٠- “اطلع من راسي”

بمعنى بلا هالطوشة صار وقت تفل.

١١-“مستعجل”

يعني مش مستعد اللبناني يعطي ولا دقيقة كرمال حضرة جناب إزعاجك.

١٢-” بروح وبيجي غيره”

غالباً بتستعمل مع العالم اللي زحطت من حياتنا لأسباب بتطلع منيحة بالآخر.

١٣-“مش ناقصك”

هون بيستعملها اللبناني ليقلك انو مش رايقلك أبداً فالأحسن تفل.

١٤-“روحة بلا رجعة”

هون بتجي بمعنى انو تزحط نهائياً، يعني خلص حبيبي باي باي معش تشرف لهون!

وانتو كيف بتزحطوا للعالم المزعجة؟

بدكن تضحكوا؟ ١٢ مواقف لبنانية منقول فيها “حبيبي” أبداً ما دخلها بالحب.