٨ محلات فيكن تعملوا فيها عرسكن بالشتوية بلبنان

الأعراس الشتوية رومانسية كتير ودافية ومليان حب مع شموع وزينة وموسيقى وأكل طيب حد النار وحتى تلج أبيض. إذا عم تفكروا تتجوزوا بالشتوية حبينا نساعدكن ونعرفكن على عدة خيارات مناسبة لعرس بالشتوية.

١. فيلا بلوتيك Villa Bleutique، جبيل

فيلا بلوتيك Villa Bleutique بيت تراثي وقطعة سما على الأرض موجودة بمنطقة البربارة بجبيل، بيتميز بطلة على البحر وبقعدة حجر وقناطر. هل بيت بيتمتع بفسحة كبيرة وحديقة فيكن تستمتعوا فيها وتحتفلوا بمناسباتن الخاصة ببيت بيشبه قصر الأحلام.

الرقم: 072 888 78

٢. مطعم لولا، النعص-بكفيا

مطعم ساحر موجود بجبال لبنان بقدم مجموعة متنوعة من الأطباق الفرنسية وأطباق البحر المتوسط متل قطع اللحمة والفوندو وجميع أنواع الجبنة والسلطات والدجاج وأكتر. القعدة جوا دافية مكنكنة حد النار مناسبة لتحتفلوا بخطبة أو عرس على الطراز الجبلي الراقي مع أضواء خافتة وشموع وديكور فخم.

الرقم: 706 062 71

٣. قصر الشاطر حسن، راس مسقا

الشاطر حسن بالاس مطعم لبناني أصيل وفاخر بقدم أطباق لبنانيي تقليدية أصيلة. بيحكي قصة 40 سنة من النجاح، قعدتو غير شكل وما بتكمل غير مع سفرة طويلة عريضة من أطيب الأكل اللبناني على أصولو، مازة ومشاوي على أنواعها، وكل شي عندن بينعمل من مكونات طازة. فيكن تعملوا عرسكن بالصالة الفخمة لي بتتميز بنفحة شرقية وتعتبر المكان المناسب لإقامة عشا رومانسي مع شموع والإحتفال بالمناسبات الخاصة مع العيلة والأصحاب.

الرقم: 450 410 06

٤. شاتو رويس Château Rweiss، شننعير

يعد قصر رويس من أشهر قصور الأفراح بلبنان، وهوي من أكتر المحلات الرومانسية. بصرف النظر عن ديكور القصر الراقي، بقدم شاتو رويس تجربة خيالية أصيلة وأنيقة. تأكدوا إنو تتركوا وقت كبير للصور لأن رح تطلع كتير حلوة من ورا جمال الفن والتراث والديكور الساحر الموجود.

الرقم: 237 954 70

٥. ذا فيلا The Villa، ضبيه

بتتميز بقعدة ساحرة، ديكور فخم وراقي بالإضافة لمناظر خيالية وإضاءة ساحرة وأجواء الرومانسية لا يعلى عليها: رح تقضوا ليلة من العمر. تجربة العرس في مميزة من جميع النواحي، من الديكور والفخامة، الأضوية والشموع والتريات…بينجمعوا مع اللقمة الطيبة ليقدموا أحلى تجربة.

الرقم: 000 845 71

٦. تراث Turath Event Space، بيروت

بيرون من أقدم المدن بلبنان فيها البحر والثقافة والسهر والمعالم التاريخية. وتراث هو واحد من أجمل المحلات الموجودة ببيروت ويلي بيتميز بوجود ديكور ساحر ومرموق، فيكن تقضوا أحلى الأوقات مع العيلة وتحتفلوا بفرحتكن الكبيرة وتاخدوا أجمل الصور وكمان تعيشوا الرقي بواحد من أقدم البيوت العتيقة بالعاصمة.

الرقم: 833 554 70

٧. بيت سمار، دير القمر

بيت حجر عتيق على الطراز التقليدي، بيتحوي على قناطر داير من داير، البواب والشبابيك خشب كلاسيكي راقي، هيدا عدا عن الألوان الرايقة يلي بتجبلكن راحة البال من أول ما تفوتوا. المطرح مثالي لتحتفلوا بمناسباتكن الخاصة وتسرحوا بديكور ساحر. بتلاقوا برا جنينة خاصة وتراس كبير مع جلسة كتير حلوة وطلة على الجبل والبحر! إذا عبالكن تجمعوا الماضي والحاضر، التراث والحداثة بحفلة عرسكن هيدا المحل خياركن الأفضل.

الرقم: 411 661 03

٨. دير الأمرا، دير القمر

على مدى السنين، حافظ دير الأمرا على هندستو التراثية وديكورو المميز التاريخي. واليوم هوي مثال حي عن تاريخ لبنان بكل تفاصيلو وكل زاوية وحجرة في بتخبر قصة وحكاية. للأشخاص يلي بحبوا يحتفلوا بعرسن بالجبل مع جو قروي بعيد عن البحر والمدينة، هل بيت هوي أفضل خيار. فيكن تعملوا حفلتكن بساحة القصر جنب القناطر مع الأضوية الخافتة والأكل الطيب.

الرقم: 935 119 71

شوفوا كمان، مطعم يوناني جديد ببيروت: رومانسية وأكل طيب.