٤ مسلسلات لبنانية وعربية فيكن تشوفوها على منصة شاهد

كلنا زهقانين من البيت بهل فترة من بعد الأعياد وبسبب البرد وبعد ما طار المعاش من أول الشهر، فبيطلع على بالنا نتسلى ونموه شوي ونقضي وقت حلو من دون ما نتكلف ولا نغلة.

لهيك جمعنالكن مجموعة من المسلسلات الحرية والجديدة لي فيكن تحضروها ببيتكن على منصة شاهد إنتو وقاعدين عم تشربوا وتلقمشوا.

١. ستيليتو

ببلش المسلسل بوقوع جثة هامدة على الأرض! قصة المسلسل مشوقة وبتحكي عن يوميات 4 أصحاب كبروا سوا وصاروا عايشين بنفس الكامباوند. كل حدا عندو قصة، وكل قصة بتحكي خبرية وكل حلقة مليانة أحداث مشوقة، حب وغرام وانتقام. جويل، فلك، ألما ونايلا عاشوا حياة غريبة فيها طلعات ونزلات بس هل حياة تركت أثر بكل حدا بطريقة معينة. في لي نفسيتو طيبة وبضل هيك رغم الأذى لي تعرضلوا وفي الظالم لي بيختار يضل بالأذى رغم إنو داق الخير وفي لي بضحي وفي ولي بيستغل مصايب غيرو. فعلاً هل مسلسل رح يفوت على قلبكن من الحلقة الأولى بسبب الحبكة المشوقة وتسارع الأحداث والأسماء الكبار الموجودة بطاقم العمل. على فكرة هل مسلسل تصور بتركيا بجودة عالية وتحت إشراف فريق عمل تركي مبدع.

٢. صالون زهرة الموسم ٢

هل مسلسل خطف قلوب كتار بسبب إبداع نادين نجيم والقصة الحلوة، ولي مش حاضر الموسم الأول، لازم يحضر أول موسم ويرجع يكفي الحلقات الجديدة. هل عمل إخراج جو بو عيد وبطولة نادين نجيم ومعتصم النهار وطوني عيسى. بتدور الأحداث حول إطار رومانسي مختلط بدراما لايت كوميدي وهوي عمل مهضوم بتصير أحداثو بصالون زهرة مطرح ما البطلة زهرة بتسمع يومياً قصص البنات وعلاقاتن مع الرجال وكمان بتخبر عن تعرض الصالون لأضرار كبيرة سببها إنفجار مرفأ بيروت وكيف صارت حياتها من بعد الحادثة. صالون زهرة هوي المقصد الأول لنسوان المنظقة لي بحبوا يهتموا بحالن أو يهربوا من متاعب الحياة ويتسلوا مع نادين، ولكن أحداث غير متوقعة وقصة حب رح تقلب الدني وتجمعها مع شب إسمو أنس. أصداء المسلسل كانت إيجابية، لي حضر الموسم الأول بخبر قدي هل قصة مهضومة وحلوة ونسبة المشاهدة كانت عالية والجمهور كتير حب الموضوع وتفاعل مع كل حلقة.

٣. إنتقام مشروع

بتبلش أحداث المسلسل بقصة يوسف لي ضحى بسبع سنين من حياتو بالحبس بدل عن خيو خالد لي ما ربحلو جميلة ولا شوي. هل عمل بطولة محمود بوشهري، عبدالله بوشهري، أحمد السلمان، سلمى سالم، وأسامة المزيعل. بينغرموا خالد ويوسف بنفس البنت إسمها نور، صبية عراقية وبتبلش الصراعات بيناتن على مين بدو يربح قلبها. أحداث المسلسل شيقة، بتبلش بطريقة معقدة مع يوم مشئوم وحزين وبعدين بتبلش تتغير حياة الأبطال لتصير كل حلقة مشوقة أكتر من لي قبلها.

٤. الغرفة ٢٠٧

مسلسل مصري مقتبس من رواية سر الغرفة 207 للكاتب أحمد خالد توفيق. بتدور أحداث المسلسل بفترة الستينات من القرن الماضي، وبتتمحور حول الغرفة رقم 207 بفندق لونا مطرح ما بلش البطل جمال بشغلو الجديد كموظف استقبال بالأوتيل، ولكن سرعان ما ببلش يسمع إشاعات عن الغرفة 207 الغامضة وعن كل الزوار لي عم يجوا عليها، فبلاقي حالو صار مهووس بكشف الحقيقة وخايف من مل شي مخبى. كل حلقة عبارة عن بحث عن المستور بطريقة شيقة ومؤثرة بتعلق المشاهدين وبتثير اهتمامن. هل عمل بطولة محمد فراج، ريهام عبد الغفور، ناردين فرج، مراد مكرم، كامل الباشا، يوسف عثمان ومريم الخشت. لكل حدا بحب القصص الغامضة والمثيرة، رح ينبسط بهل مسلسل لي في كتير action وأحداث مشوقة ضمن حبكة ما بتزهق أبداً رغم إنو الغموض رح يضل موجود لحد ما ينكشف المستور.

شوفوا كمان، ١٠ فنانين بلشوا مشوارن الفني ببرنامج ستديو الفن.