أطيب ٤ محلات صفيحة ببيروت

من بعد ما خبرناكن عن أطيب محلات كنافة ببيروت، اليوم رح نخبركن عن أطيب محلات صفيحة ببيروت. ما في أطيب من أكلة الصفيحة مع عصرة حامض ورشة حر. شي بياخد العقل! شوفوا هل محلات يلي بقدموا صفيحة شهية!

١. مزارع اللقيس، القنطاري-بيروت

على فكرة مش ضروري تطلعوا على بعلبك لتاكلوا أطيب صفيحة لأن بعلبك نزلت لعندكن، كل لي عليكن تعملوا تروحوا عد مزارع اللقيس لي بحضروا أطيب صفيحة بعلبكية. الصفيحة عند اللقيس معجونة باللبن والماي البقاعية الطيبة، فما عليكن غير تطلبوا العيران البعلبكي الطازة وتستلذوا بكل لقمة.

الرقم: 824 373 01

٢. الحلاب، طريق المطار-بيروت

يمكن رح تتفاجأو إنو عند الحلاب في صفيحة بس ما فيكن تعرفوا قدي طيبة غير لتجربوها. منظر الصفيحة بيفتح النفس، عجينة طرية مع نعنع ولحمة رخصة وفنجان شاي إكرك عجم. الصفيحة عند الحلاب لذيذة بكل الأوقات، ممكن تاكلوها الصبح، وممكن الضهر، وما في أي مشكلة إذا أكلتوها بالليل.

الرقم: 1881

٣. كافيه بدارو، بدارو

إذا بدكن تاكلوا صفيحة ما عليكن إلا إنكن تدوروا سيارتكن وتوصلوا عكافيه بدارو، القعدة كتير مهضومة وقريبة على القلب. رح يعرضوا عليكن كذا نوع صفيحة وإنتوا بتختاروا: صفيحة حرا، الصفيحة الاسطنوبلية،صفيحة سجق وجبنة، صفيحة الحلا لي بتجي مع شوكولا وفستق على الوج. مش بس رح تاكلوا صفيحة، فيكن تجربوا الأكل اللبناني الطيب لتسندوا بطنكن منيح.

الرقم: 674 602 03

٤. حلويات البابا، قريطم

ما في أطيب من الصفيحة عند حلويات الباب، لي مش بس طعمتا روعة وكمان شكلا من برا كتير مرتب. بتقعدوا وبتجي الصفيحة على طاولتكن وبتزيدوا عليها عصرة دبس الرمان ورشة حامض على ذوقكن مع صحن خضرا غير شكل. ضروري تجربوا الكنافة على التحلاية… وفنجان قهوة مع برازق كمان… شي بموت!

الرقم: 178 787 01

تجربة فريدة مننصحكن تخوضوها!