أطيب ٥ محلات كبة ببيروت

من بعد ما خبرناكن عن أطيب محلات صفيحة ببيروت، اليوم رح نخبركن عن أطيب محلات كبة ببيروت. ما في أطيب من أكلة الكبة بكل أشكالها وألوانها مع كاسة لبن وخيار ورشة نعنع. شي بياخد العقل! شوفوا هل محلات يلي بقدموا كبة شهية!

١. كبة زمان، الأشرفية

مطعم متخصص بالكبة الزغرتاوية الأصيلة والطبخ اللبناني التقليدي. عبالكن صحن كبة بالصنية مع كاسة خيار ولبن بتشق الروح؟ بتلاقوا عندو كل أنواع الكبة: الكبة النية، الكبة المشوية، الكبة بالصنية، الكبة قراص، الكبة بشحمة، الكبة بلبن ودوقوا وشوفوا الطعمة. طريقة التقديم رح تخليكن تحبوا الكبة أكتر وأكتر!

الرقم: 934 429 01

٢. ة مربوطة، الحمرا

محل مهضوم بحضر طبق الصحن اليومي ولقمة بيتوتية وعندو قعدة بسيطة ومريحة. فيكن تقعدوا بالطابق الأرضي وتستمعوا بالموسيقى المختارة بعناية، أو تطلعوا عالطابق الأول المخصص للطلاب وتخلصوا شوية شغل عندكن ياهن. الكبة عندن متل كبة البيت وفيها نفس طيب، فيكن تاكلوا كبة نية، كبة كباب، كبة ملوكية بالباتنجان والجوز والرمان، كبة بالصينية كبة أرنبية وغيرها من الأكلات لي بتشهي.

الرقم: 880 743 01

٣. ليلى من لبنان، الأشرفية

مطعم بيروتي عريق بحضر أطيب الطبخات البيتوتية وخص نص الكبة بكل أشكالها وألوانها وهوي عبارة عن مساحة جميلة، نقوا تقعدوا بالزاوية المفضلة عندكن مع اللقمة الطيبة. الكبة بالصينية معمولة على الأصول بتتقدم مع صحن لبن وخيار غير شكل، الكبة كباب juicy وبتشهي والكبة النية منظرها لحالو بيحكي عنا وما بتكمل قعدتكن غير بركوة قهوة غير شكل بعد الأكلات.

الرقم: 890 216 01

٤. مزيان، الحمرا

بقدم مجموعة أطباق من لبنان ومختلف البلدان العربية وأطيب شي عندو الكبة. فيكن تقضوا وقت لذيذ عندو على الغدا، إنتو وعم تلعبوا طاولة، تقروا كتاب أو حتى تاخدوا شوية عرق بلدي من يلي بحبوا قلبكن على أنغام وألحان أغاني قديمة. ضروري تجربوا عندو الكبة المشوية مع لبن أو سلطة عربية!

الرقم: 015 293 71

٥. جوليا، الأشرفية

مطعم بيشبه كافيرنات اليونان بقلب جزيرة سانتوريني، بيطغي علي لون الأزرق والأبيض ويتميز بجو بيتوتي مهضوم. بحضر هل مطعم كل أنواع الكبة لي بتخطر على بالكن ويمكن هوي المطعم الوحيد بالعالم المتخصص بس بالكبة اللبنانية، جايبلكن كل طعمات ونكهات الكبة السرية من إهدن. بتحسوا بالملوحة، بتحسوا بالحشوة الغنية وبتتمنوا تاكلو منا كل يوم وتخايلوا فوق هل شي تكون محشية حمص أو تكون محشية لبنة حتى رح تلاقوا كبة محشية جبنة فيتا. أصناف ولا بتخطر على البال: كبة ممدودي، كبة ببصل، كبة زغرتاوية وكتير من الإختراعات والنكهات الغريبة بالكبة. هل مطعم تجربة ومغامرة جديدة بحد ذاتها!

الرقم: 833 187 70