٦ أفلام لبنانية رومانسية تحضروها عالفالنتين

تخايلوا معنا هالجو الحلو: قاعدين مكنكنين تحت الحرام مع الحبيب، غمرة ومسكة إيد ولغة عيون، رومانسية بيتوتية بسيطة بعيدة عن عجقة الناس… إذا مخططين تحضروا فيلم رومانسي مع الشريك ع الفالنتين، شوفوا هال كم فيلم اللبناني.

1. بغمضة عين

بطولة زياد برجي وهشام حداد ودانا الحلبي، البطل “جاد” بيشتغل مهندس معماري و صرلو سنتين بيشتغل بمشروع ضخم على أمل يصير المدير، بس بتدخل البطلة “نور” على الخط وبتصير هيي المديرة وجاد مجرد مساعد، ومن هون بتبلش أحداث قصة الحب الشيقة، والمشاعر بتتأرجح ميلة على الحب والإنجذاب وميلة على الكراهية.

2. خبصة

بين الخوف من الإرتباط والتحديات المادية بالبلد، البطل والبطلة بعلاقة حب بتبلش بخبصة ومساكنة وبتخلص بالزواج!

3. لأني بحبك

فيلم بطولة وسام صليبا وكريستينا وهشام حداد، بيحكي عن قصة حب بتبلش مع شب غني ما بفكر بالحب حتى النهار لي بيلتقي بالصدفة بنادلة على قد حالها عم بتحاول تكسب لقمة عيشها، ومن هون بتبلش الأحداث الشيقة والحب.

4. زفافيان

فيلم كوميدي رومانسي بيحكي عن قصة حب بين شب لبناني غني عم بيفتش على بنت بمواصفات اللي بدها ياها ستو الغنية، بيلاقي هالمواصفات ببنت أرمنية على قد حالها، بس عيلتها ما بتقبل تتجوز من شخص مش أرمني، ومن هون بتبلش قصة الحب والأحداث الشيقة.

5. حبة كراميل

هالفيلم المهضوم من بطولة ظافر العابدين وماغي بو غصن، بكمل قصة مسلسل كراميل لي بيحكي عن بنت بتاكل حبة كراميل بتعطيها القدرة انو تقرا شو في بعقل الرجال وتسمع أفكارن من دون ما يعرف حدا. بتبلش قصة الحب بالفيلم لما تحط البطلة عينها على الشب الغني اللي جايي من أوروبا، هل فيلم كوميدي ورومانسي بنفس الوقت.

6. كراميل (سكر بنات)

بيحكي عن الحياة اليومية لخمس لبنانيات من مختلف الأعمار والخلفيات الاجتماعية عم بعانو من مشاكل خصها بالزواج والتقدم بالعمر والهوية والعلاقات الغرامية الصعبة، وبظل هالظروف بتبلش قصص حب خجولة ببيروت وبتصير تطور شوي شوي.

شوفوا كمان، بيوت ضيافة ساحرة للعشاق بعيد الحب.