لأنو المغيب ما بِخيب، رح نعرّفكن على محلّ جديد بياخد العقل

شو في أحلى من القعدة والدّردشة مع الأصحاب بمحلّ بشيل الهمّ عن القلب؟…ولا شي!

زهقنا من القعدات العاديّة والمحلّات اللي ع نسق بعض، رح نعرّفكن اليوم على محلّ جديد ونعرضلكن برنامجو الأسبوعي.

“دوون Dawn” بضبية عالطريق البحرية بوجّ الABC الطابق العاشر. بيفتح كلّ يوم من التنين للأحد عالمغيب، من الساعة سبعة بعض الضهر للساعة وحدة بعد نصّ ليل. بس أكيد جمعة وسبت بكونوا مولّعينا الشبيبة فالسهرة صبّاحيّة… وعندو أرغيلة وعليه منظر المغيب “مُخيييييففففف”!!

وبعد المغيب عندو برنامج حافل. ولا نهار بتروحوا إلّا ما بكون عندو شي سبيسال يقدّملكن ياه. كرمال هيك، قرّرنا نعرضلكن هالبرنامج، ونقّوا واختاروا اليوم اللي بتلاقوا أنسب وأقرب لستيلكن إنتو ورفقاتكن.

التنين: لتنهي نهارك الطويل بضحكة، موسيقى عالرايق مع Pitcher، بتشتري وحدة بيطلعلك وحدة ببلاش! بس ما تسوق من بعدا دخيلك!

التلاتة: ميني برغر مفتوح لتاكل وتشبع وBasil Ginمفتوح لتنسى إنّك بعدك بتاني يوم من الأسبوع!

الأربعا: السّهرة عاللبناني من الساعة ١٠. مازة لبناني وعرق مفتوح… والتحلاية كنافة! (:

الخميس: هيدي الليلة ليلة العشاق، بيجي جوزيف أبي عقل بيدق عالبيانو مع عرض ترفيهي لتنبسطوا سوا.

الجمعة: بتولع السهرة من الساعة عشرة مع DJ MARVIK وMC SEB والهزّ للصبح.

السبت: ما انطفت لتولع! كلّ سبت DJ غير شكل لترقصوا الليل كلّو على أجدد وأحلى الأغاني.

الأحد: هيدا النهار منكرهوا كلنا، بس هلّق رح تصيروا تحبّوا لأن دوون عندو الأرجيلة بنصّ حقّا. يلّا هُجووووم!!

يييي! أوعا تنسوا كمان، كل جمعة وسبت Happy Hour من السبعة للتمانة ونصّ!

يلّا، هيدا برنامج بينحفظ عالغايب! 😉