أنواع الجمهور بالفوتبول اللبناني

من المعروف جدا انّو الجمهور اللبناني المتابع للفوتبول عندو روح رياضيّة عالية ما بتلاقيها بالدول الأجنبية. وهيدا الشي ببلّش من تقبّل الربّح والخسارة لعند طريقة متابعة المباراة.

١. الشخص اللي بضلّ عم بفقّي بزر من أول المباراة لآخرها.

٢. الموتّر من قبل متبلّش المباراة، وطول الوقت على أعصابو عم يدعي فريقو يربح.

٣. المتحدّث الرسمي باسم الحكم والمعلّق بنفس الوقت.. طول المباراة عم يعطي ملاحظات وعم يحكي تحرّكات اللّاعبين خطوة خطوة.. ويا ريت كل شي عم يقولو صح.

٤. اللي بيجي عبالو يعطي تعاليم للّاعبين: يلا روح، شوط، غطّي عليه، فتحلو الطابة، رفاع، أعطي pass..

٥. المعتّر يلّي كل المباراة عم يقول للقاعدين قدام منّو “قعدوا بدنا نشوف”. وأكيد بينبحّ صوتو، بتروح نصّ اللعبة عليه، وبضلّو واقفين وعم ينطّو.

٦. الشخص اللي بضل يسبّ بالحكم، ان كان على غلط أو حتّى عم يحكّم صح.. خلص مقرّر يكرهو.

٧. ما فينا ما نذكر اللي بضل مولّعها بالهتافات والأغاني ، بضّل عم يصرّخ ويحمّس الجمهور بس بيرجع عالبيت مبحوح.

٨. وأهضم شي اللي جاي ضيف شرف، مش عارف مين ضد مين ولا مين ربح.