تصنيف العائلة اللبنانية حسب اللهجة

متل أي بلد بالعالم، كل منطقة بلبنان إلها لهجتها الخاصة لبتفرقها عن باقي المناطق بأسلوب الحكي. إبن الشمال مثلا ما بيحكي متل ابن الجنوب وأهل بيروت ما بيحكو متل أهل البقاع وأهل الجبل! اللهجات بتختلف كتير بطريقة النطق وبالمعنى كمان، لهيك كتير أمرار بس يسمع اللبناني لهجة ما بتاخد معه كتير ليبلش يحلّل شو أصل الشخص ومن وين جاي.

إذا حابين تعرفو أكتر عن اللهجات اللبنانية المتنوعة، نقينالكن ٥ تغريدات وفيديوات لنعرفكن عأكتر ٥ لهجات لبنانية معروفين:

١. اللهجة الشمالية

واحدة من أصعب اللهجات بالنسبة لسكان المناطق الباقية لأن هاللهجة فيها كلمات ما في غير أهل الشمال بيعرفوهن!

عمنوا والله هيي من شوي اجا يصلح الاجاز بس ما كان معي بالدزدان قام قلتلو لاقيني حد السجرة و اسا لهلق ما اجا..وانا لازم اررجع ظبط السداج
#طروبلسي #حكيني_بلهجتك

— Dalia Dik (@DaliaDik) March 16, 2018

#حكيني_بلهجتك ash fi ash sor ?

— ‏ܚܰܕܫܺܝܬܶܗ (@Hadxhity) March 14, 2018

٢. اللهجة البعلبكية

الفيديو لحاله بيحكي!

#غنّي_بلهجتك#لهون_وبس
في احلى من اللهجة البعلبكية 😃 pic.twitter.com/iRpdASUnLI

— houssein hamze (@houss_hamze) November 22, 2018

بعلبيك، بحوبك، أومي، كِشك، جوهتك بالإمامو علي، زولم، حيّد هكراح، روح هاكجين، تعا لهاون، مجوِّه الله علايك ، وسوترِت أُختك #شو_بتعرف_عن_بعلبك

— sara Mohammad kassas 🧘🏻‍♀️ (@sara_kassas) March 11, 2018

٣. اللهجة البقاعية

متل ما أهل الشمال وأهل بعلبك عندن كلمات ما حدا بيعرفها غيرهم، كمان أهل البقاع ذات الشي!

#حكيني_بلهجتك
فتاح البلّور/ زجاج#هرمل

— zaki nasreddine (@nasreddine_zaki) March 16, 2018

٤. اللهجة البيروتية

أكتر لهجة لبنانية معروفة! في كتير أجانب بفكرو إنو اللهجة البيروتية هي اللهجة اللبنانية الأصلية وما في غيرا بس هالشي مش مزبوط!

اشبك لاوي #حكيني_بلهجتك

— Mona Chéhab (@chehab_mona) March 14, 2018

خووبيزززز#حكيني_بلهجتك

— غزاوي (@ahmadghazaoui) March 16, 2018

٥. اللهجة الجنوبية

وهيدي مجموعة كلمات وجمل ومعانيها بيستعملوها بالجنوب بس:

#حكيني_بلهجتك
مليح =منيح
هنيكاهلي= هونيك ابعد شوي
سلعدة= الحمار المتذاكي
ظيعة =ضيعة
تيبئ =طابق
يقتع خملك=الله يحرقك (بمعنى)
قباري
يا علان = اي اسم (فلان و علان)
بدي بعزء = بدي اصرف
شوفولي هل الخزيييين في موي .
شحار يلتك لت= الهم يركبك
طربيزا او سكملة = طاولة صغيرة

— malak wehbi (@wehbi_malak) March 14, 2018

شو يا اباري اسا جييت .. #حكيني_بلهجتك

— Ali .. (@alisleiman118) March 14, 2018