شوفوا معنا القصص الغريبة ورا أشهر أغاني فيروز

بس نقول فيروز بترجع كل الذكريات الحلوة على راسنا ومنحس بالفخر والحب، هل صوت الأسطوري لي بحسسنا بالسلام والفرح والطمأنينة ما بيكمل نهارنا إلا في بس شي مرة سألتوا حالكن، كيف تم تأليف أشهر أغاني الست فيروز؟ خلينا نخبركن اليوم عن أجمل وأغرب قصص ورا أشهر أغاني الست فيروز.

١. عندى ثقة فيك

سبق وأعلن زياد الرحبانى إنو كتب هل غنية للمثلة القديرة كارمن لبس ليعبرلها عن قصة حب تجسدت بعلاقة عاطفية ربطتو فيها 15 سنة. بتقول الخبرية إنو قعد زياد على البيانو وكارمن حدو وصار يدندلها ألحان وكلمات هل غنية وهيك تألفت هل تحفة الفنية وغنتها رجعت فيروز وصارت من أشهر أغانيها.

٢. عهدير البوسطة

كتبها زياد الرحباني لمسرحية “بالنسبة لبكرة شو” وكان مفروض يغنيها المطرب جوزيف صقر، بس بوقت عرض المسرحية سمعها عاصي الرحبانى وحبها كتير وطلب من زياد إنو يقدمها لفيروز، ووافق زياد بشرط يشتريها بـ 500 ليرة لبنانية، وهيك صار فعلاً. وكسحت هل غنية الساحات الفنية بوقتها وحققت نجاحات كبيرة بصوت فيروز وصار هل فيلم رمز وطني كبير وهل غنية ببساطتها فاتت على قلوب كل اللبنانيي، على الرغم من انتقاد البعض لفيروز بوقتها معتبرين كلمات الأغنية سخيفين متل “يخربيت عيونك يا عاليا شو حلوين” وقال البعض الآخر إنها عم تشجع على الخيانة الزوجية بس قالت الست فيروز “في واحد هوي ومرته ولو شو بشعة مرتو…لو بيشوف عيونك يا عليا شو حلوين. ” رغم كل الإنتقادات قدرت هل غنية تكسر كل المقاييس وتوصل على قلوب الناس!

٣. كيفك إنت

من أجمل الأغاني لي غنتها فيروز على الإطلاق، كل ما نسمعها مسنرح بأفكارنا وبمشاعرنا لبعيد ومنشعر بالسلام والحب والطمأنينة. أكيد ما بتعرفوا قصة هل غنية… بقولوا بأحد الليالي الشتوية الباردة ما كان في كهربا، قعدت فيروز على ضو الشمعة عم تسمع إبنها عم يغنيلا غنية جديدة وحب يسمعها الغنية كاملة وهيي قالت بس تجي الكهربا بسمعها لكن ضل مصر لسمعها ياها على الكاسيت، وبس خلصت قالتلوا فيروز “شو بدنا نعمل بهل غنية” فقلها بدك تغينها وترددت كتير بوقتها وخافت من الإنتقادات لأنو كلماتها فين غزل بالرجل وتحديداً عبارة “ملا إنت”، وضلت مرددة فيروز لحد ما قبلت بعد أربع سنين تغنيها لأول مرة. حققت “كيفك إنت” نجاحات خيالية وصارت من أشهر الأغاني اللبنانيي على الإطلاق ومن أشهر الأغاني الرومانسية لي بعبر فيها الحبيب عن حبو لحبيبتو.

٤. سألوني الناس

هل غنية بتحكي عن قصة حب عاصي وفيروز، عام 1972 وقت كانت عم تأدي فيروز مسرحية “المحطة” وكان عاصي مريض ومنصاب بنزيف بالراس، كتب منصور هل غنية ولحنها زياد لي كان عمرو بس 17 سنة وطلب من فيروز تغنيها بمسرحيتها وهيك صار. أخدت هل غنية نجاح كبير بوقتها وعملت ضجة كبيرة وفاتت على قلوب الجمهور، وبس صح عاصي شالها من المسرحية بس سرعان ما رجع ردها بسبب طلب الجمهور الكبير عليها. وبسنة 1986، غنت فيروز “سألوني الناس” على المسرح مجدداً بس هل مرة من دون عاصي لي كان فارق الحياة، وبس وصلت فيروز لعند كوبليه “لأول مرة ما بنكون سوا” وقفت عن الغنا وما قدرت تكفي الغنية.

شوفوا كمان، ٢٧ شغلة بتلاقوها بكل بيت ضيعة بلبنان.