سمعتوا عن بيت الضيافة الساحر على المينا بطرابلس؟
اليوم مشوارنا على مدينة طرابلس التاريخية وتحديداً على منطقة المينا النابضة بالحياة ولي بتتميز بسحر لا يوصف لنعرفكن على بوتيك أويتل مخبى ومش الكل بعد مكتشفوا.
جاهزين؟ غمضوا عيونكن وتخايلوا حالكن على البحر عم تسمعوا صوت الموج وتتفرجوا على البحر الأزرق… بقلب بيت تراثي وقطعة تراث وعم بتبرموا بشوارع مدينة ما بتعرفوا عنا شي بعد بس حلوة كتير وجذابة.
بيجمع فندق Victoria Boutique Hotel بين أصالة بيت الضيافة وراحة فندق فاخر بقلب مبنى تراثي. قاعد بقلب المينا مطرح ما الثقافات والحضارات لي ميزت هل مدينة بيلتقوا، وهوي واحة من الهدوء ونقطة انطلاق مثالية لزيارة منطقة شمال لبنان المميزة.
هل بيت قصتو حلوة كتير، تسمى فيكتوريا على إسم ست كانت عايشة على المينا، شعرا كان طويل وحلو كتير وكانت معروفة بقلبها الطيب وكرمها وجمالها وكان بيتها عطول مفتوح للكل وجنينتها مليانة ورود وبرود.
هل فندق حافظ على الذكرى تبعها وبيستقبلكن بقلب مبنى تراثي بيتألف من مجموعة متنوعة من الغرف المصممة لتلبية ذوقكن وتأمين راحتكن لتعيشوا التجربة الطرابلسية الأصيلة.
هون فيكن تستمتعوا بفنجان قهوة أو كوكتيل مع أطيب الخلطات الصيفية والفواكي من مقهى وبار الأوتيل بالجنينة، على التراس أو حتى على بلكون أوضتكن.
فيكتوريا بقدم العديد من الأنشطة المختلفة متل ركوب الشخاطير وجولة بقلب طرابلس والمينا وركوب الدراجات وغيرها من النشاطات الترفيهية إلى جانب قعدات مريحة بقلب غرف الفندق. وفيكن كمان تكتشفوا شوارع طرابلس وتنزلوا على السوق العتيق وتزوروا قلعة طرابلس الأثرية وتتعرفوا على هل مدينة بكل تفاصيلها لي أكيد رح تدهشكن.
هل محل رح يخليكن تسافروا من دون ما تدعسوا برات لبنان، بكفي إنكن تاخدوا إجازة، تنقوا الغرفة لي بتعجبكن وتجوا تعيشوا أجمل إيام حياتكن.
بالنسبة للأسعار فهيي معقولة نوعاً ما:
إذا حجزتوا studio رح بتكلفكن الليلة 120$، أما الغرفة مع Terrace فرح بتكلفكن الليلة فيها 80$، الغرفة الdeluxe double بتكلف 70$ والdeluxe queen بتكلف 65$ على الليلة.
بس تفيقوا الصبح ناطرتكن ترويقة بتفتح النفس مع مكونات وأطباق فريش وقعدة متل الحلم وفيكن كمان تزوروا البار ساعة لي بدكن لتبلوا ريقكن بشي بارد وتروقوا أعصابكن.
إذا عبالكن تحجزوا أو تستفسروا أكتر اتصلوا على 204 529 76
شوفوا كمان، أجمل مشوار… تجربة غريبة ومشوقة من قلب البترون!
