أحلى مشوار…١٥ شغلة فيكن تعملوها بالشوف

اكشفتوا كنوز منطقة الشوف أو بعد؟ الشوف معروفة بالمعالم الأثرية والتراثية، الضيع الحلوة، جنة المرج والوادي والجبل والنبع. مشوا نروح مشوار سوا على هالمنطقة، ونعرفكن على كم شغلة مهضومة فيكن تعملوها.

1- إكتشفوا محمية غابة أرز الشوف العظيمة

قاعدة هالمحمية المباركة على علو 2000 متر تقريباً، بتتفرجوا على مناظر من فوق البقاع، سد الليطاني، وكمان بحيرة القرعون وكمان بتقدروا تتمشوا بغابات الباروك أو معاصر الشوف اللي عمرها آلاف السنين.

2- جربوا أطيب فنجان قهوة من عند قهوة السوق ببعقلين

كافيه زغير ولزيز بالسوق، بيفتح بكير وبيقدم أطيب قهوة لتبلشوا نهاركن صح!

الرقم: 632 889 78

3- تعرّفوا على الكنوز المخباية بضيعة بعقلين

بتلاقوا قصر حمادة المشهور، وكمان المكتبة الوطنية اللي عمرها سنين، ومطعم شلالات الزرقا ساحر الجمال وناطركن على أطيب أكل!

رقم المطعم: 301 560 03

4- إكتشفوا ضيعة المختارة، جوهرة من جواهر الشوف المخباية

وتفرجوا على قصر المختارة بالضيعة، وكمان إتغدوا بمطعم شلالات نبع المرشد المميز، بتنبسطوا بأطيب لقمة لبنانية على صوت المي وبتسرحوا بمناظر خيالية للطبيعة.

رقم المطعم: 220 310 25

5- برموا ضيعة دير القمر التراثية وإكتشفوا شوارعها وتاريخ عمارتها القديمة

هالضيعة وحدة من أجمل الضيع اللبنانية ومقصد سياحي مهم بلبنان، بتتميز بفن العمارة القديم من القرن الـ17 وقرن الـ18 متل خان الحرير وقصر فخر الدين.

6- زوروا أوتيل ومطعم دير الأمرا الأثري

أوتيل عمرو 200 سنة ويعتبر من أروع الأوتيلات التاريخية والتراثية بلبنان، بين قعدتو الساحرة وحجرو القديم وقناطرو العالية بتلاقوا مطعم بيقدم أكل لبناني غير شكل مع مناظر للجبل بتاخد العقل!

الرقم: 557 511 05

7- جربوا أحلى نسمة هوا جبلية عند بيت الجبل بدير القمر

بقلب بيت جبلي قديم بتلاقوا قعدة تراثية بتطل على أجمل الجبال والوديان بدير القمر، القعدة مغمورة بالجنينات والشجر والورد، كمان عندن بيوت ضيافة لتقضوا ليلة من الخيال بالمنطقة.

الرقم: 767 160 71

8 – وما بيكمل مشواركن بدير القمر من دون زيارة لبيت القمر

بيت القمر بيقدم ترويقة بيتوتية وغدوات بالجنينة، بيتميز هالمطرح بالجنينة الساحرة وديكور الستينات الرومانسي.

الرقم: 397 981 70

9- انبسطوا بالقعدة الملوكية بين الجنينات المعلقة عند بيوتي صوب معاصر بيت الدين

أحلى قعدة لتسترخوا تحت الشمس وجنب المسبح، وبنسّم عليكن الهوا الجبلي، وبس 5 دقايق مشي عن بيت الدين!

الرقم: 200 726 03

10- عيشوا تجربة تخييم من الحلم بقلب بيوت الشجرة عند River Zen صوب ملتقى النهرين

قعدة هالمخيّم جنب النهر وعندن نشاطات مميزة لتعيشوا أحلى اللحظات بأحضان الطبيعة.

الرقم: 716 680 71

11- خدوا أجمل الصور بقصر بيت الدين وعيشوا أحلى اللحظات

المعلم التراثي الساحر بيرجع للأمير بشير من القرن ال19 ميلادي وعندو أسلوب عمارة شرقي متل بالحكايات. بيضم أوتيل وقصر مير أمين، بتقضوا كم نهار بهل قصر التاريخي وبتنبسطوا بأطيب أكل على تراس بيطل على المنطقة كلها.

12- زوروا قلعة موسى وبرموا بعالم من الجمال والفن والإبداع

تماثيل من الشمع، مجموعات مميزة من الأسلحة القديمة، وجماليات بتاخد العقل!

13- غطسوا ببحيرة سرجبال وخيّموا جنب الشلالات

أحلى بيكنك بجنة مخباية عن العالم!

14- جربوا الأكل النباتي والقعدة اللي بترد الروح عند الكوارة بضيعة كفر قطرا

بيت برجعكن على أيام الضيعة مع لقمة بيوتية شهية!

الرقم: 290 424 03

15- طلعوا على قلعة نيحا المحفورة بالصخر والمعلّقة بين الأرض والسما

هالقلعة القديمة عمرها 2800 سنة وبتطل على مرج بسري العظيم والمليان أثارات رومانية وطبيعة ساحرة.

شوفوا كمان، تعرفوا على هل بيت: قطعة من المالديف بقلب لبنان.