شو قصة قصر دونا ماريا سرسق بصوفر؟

كلنا سامعين بعيلة سرسق، من قلب شارع سرسق، بين قصوره الفاخرة والتاريخية وشخصيته البارزة الليدي إيفون سرسق كوكرن الراحلة أو ما إشتهرت بلقب “سيدة القصر”. بس ثروة ونفوذ السراسق إمتدت أبعد من بيروت، لضيعة مميزة بعاليه إسمها صوفر وتمثّلت بقصور خيالية جذبت الناس لإلها حتى اليوم. واحد من أبرز هالقصور هو قصر دونا ماريا سرسق، خلونا نشوف قصتو سوا. 

لمحة عن تاريخ قصر دونا ماريا سرسق:

قصر دونا ماريا سرسق هو عبارة عن مبنى تاريخي بناه ألفرد سرسق زوج دونا ماريا سنة ال 1909 ببلدة صوفر. وكانت عبارة عن مصيف فاخر لعيلة سرسق بالجبل، قضوا فيه أيام الصيفية لحد سنة ال 1975، يعني من لما بلشت الحرب الأهلية اللبنانية. هالمبنى بيتميز بالهندسة المعمارية اللي بتشبه القصور اللي بالحكايات والعناصر الفنية، القناطر العالية، والجنينة الكبيرة وجذبت كتار عليه أد ما حلو.

Image retrieved from Old Beirut Lebanon.

بس عيلة سرسق كمان كانوا يملكوا غراند أوتيل صوفر بالمنطقة، انبنى بال 1890 وهو واحد من أهم الأوتيلات التاريخية بلبنان وكان بمقابل قطار الترامواي وسكة الحديد المهجورة بصوفر المحطة. وهيدا الأوتيل والكازينو جذب كل السياح والفنانين والسياسيين من كل أنحاء العالم العربي والعالم.

للأسف خلال الحرب الأهلية اللبنانية (1975 – 1990) تم نهب وتدمير أوتيل غراند وقصر دونا ماريا وتعرضوا لأضرار كبيرة، وصاروا عبارة عن قصور مهجورة بتاريخ برجوازي وتراث غني.

ليه كانت صوفر هلقد مهمة وقتها؟

من وقت ما بنى العثمانيين سكة الحديد بصوفر بال 1880، صارت هالضيعة محطة أساسية بتربط بين بيروت وسهل البقاع. وبسبب موقعها الجبلي، طبيعتها الحلوة، طقسها الحلو، وإطلالتها الخلابة على وادي لامارتين، صارت وجهة سياحية ومصيف أساسي للعيل البرجوازية البيروتية. وهالعيل و أهمها عيلة سرسق، عمّرت قصور وفيلات فاخرة بالمنطقة! وصولاً لغراند أوتيل صوفر اللي كان أول كازينو بلبنان وجذب الفنانين العرب والسياح الأجانب. مع إنو أغلب هالقصور صارت مهجورة من بعد الحرب، بس بعدها مقصد بصوفر لمحبي الأبنية الأثرية والمتاحف التاريخية.

شو صار بالقصر اليوم؟

حتى من بعد ما صار القصر مهجور، بعدو بيستقطب الزوار! الزوار اللي بيحبوا التاريخ والعمارة، لياخدوا أجمل الصور ويتعرفوا عليه. ومن بعد ترميم مدخلو وحدايقو، بيستقبلكن هلق لتحجزوا أعراسكن أو مناسباتكن الخاصة، وتعتبر خطوة بارزة لإعادة ترميم القصر بكاملو!

للمزيد من المعلومات، فيكن تتصلوا على 720 218 01 أو تابعوهن على حسابن بالرابط هون.

خبرونا، حبيتوا قصة قصر دونا ماريا سرسق؟

شوفوا كمان، متحف ال١٠٠ بيت بالبترون، شو قصة متحف هنري لوسيان؟