٧ معاصر نبيذ لازم تزوروهن مع حبيبكن بلبنان

ما في أجمل من مشوار مع الشخص لي بتحبوا على معاصر النبيذ لتعيشوا مغامرة مميزة وتدوقوا كل أصناف النبيد وتاكلوا لقمة طيبة بأجواء رومانسية.

١. أتيبايا Atibaia Winery، سمار جبيل

بس يصير الطقس برد معروف إنو النبيذ بدفي القلب، هون فيكن تتذوكوا كل أنواع النبيذ لي طالعة من المعصرة دغري مع لقمة طيبة وخفيفة من الجبنة والسندويشات اللذيذة لتحسوا حالكن بشي فيلم من إيام السبعينات.

الرقم: 478 578 70

٢. شاتو إيريتاج، قب الياس

عيشوا مغامرة زيارة معصرة للنبيذ سوا، كمشوا إديدين بعضكن وتمشوا بالمعصرة، تفرجوا على الطريقة لي بصير فيها تصنيع النبيذ والمحافظة علي وخذوا أجمل الصور، رجعوا تذوقوا الأصناف المختلفة مع لقمة طيبة وبتدفي القلب.

الرقم: 503 777 03

٣. دومين دي توريل، شتورا

بس يجي عبالكن تنعزلوا عن العالم بلبنان، ما إلكن غير تروحوا على هالمحل وتتخبوا بين حيطان الحجر، تدوقوا الأصناف البيتوتية وتحسوا بكل شي حواليكن من الطبيعة للتلج والسهول على مد عينكن والنظر.

الرقم: 140 211 71

٤. أردوم، المتين

عبارة عن بيت خشب مخبى بالجبل وبس تفوتوا علي رح تنبهروا بالزينة والديكور الساحر لي رح تشوفوا من خلالو البساطة القروية بنفس الوقت، بتجربوا سوا كل أنواع النبيذ مع سفرة مميزة على طاولة خشب مع جو دافي.

الرقم: 646 441 70

٥. شاتو قانا، بحمدون

ما في أحلى من المشوار على بحمدون، منطقة جبلية، قريبة ورايقة. بتلاقوا فيها مخمرة قانا ناطرتكن بقلب بيت حجر، من جوا القعدة تراثية متل قصور الأحلام رح تخليكن تحسوا حالكن سافرتوا. بتشربوا نبيذ، بتاكلوا لقمة طيبة وبتتصوروا.

الرقم: 043 340 81

٦. معصرة كرم، جزين

هالمخمرة قاعدة بمحل كتير حلو ومميز وبتطل على منظر طبيعي مميز، بتجوا مع نصكن التاني بتتفرجوا على جزين الحلوة، بتاكلوا لقمة طيبة وبتجربوا أصناف مميزة وبتتعرفوا على عالم صناعة النبيذ.

الرقم: 516 370 01

٧. سيبت Sept Winery، البترون

عبارة عن مخمرة قاعدة بمحل بيشبه الجنة، شجر وخضار داير من دار، لي بميز هالمحل إنو بيعملوا النبيذ من مواد طبيعية وبس من دون أي مواد حافظة. مسكوا إيد حبيبكن وعملولوا مفاجأة مميزة وقضوا نهار سوا بقلب الطبيعة، معزولين بقلب بيت القبة عم تشموا ريحة النبيذ، تجربوا الأصناف المختلفة وتاكلوا لقمة طيبة وتاخدوا أجمل الصور.

الرقم: 170 570 70

شوفوا كمان، ١٥ شغلة فيكن تعملوها بأول موعد غرامي ببيروت.